కొత్త ఇంజన్, కొత్త పేరుతో రానున్న సరికొత్త అంబాసిడర్!

Four Wheelers

oi-Ravi

By Ravi

Published: Monday, May 27, 2013, 12:43 [IST]

సికె బిర్లా గ్రూపుకు చెందిన ప్రముఖ ఆటోమొబైల్ కంపెనీ హిందుస్థాన్ మోటార్స్ భారత మార్కెట్లో అందిస్తున్న అంబాసిడర్ సెడాన్‌ ఇప్పుడు సరికొత్త ఇంజన్, సరికొత్త పేరుతో మర్కెట్లోకి రానుంది. ఆధునిక కాలుష్య నిబంధనలను దృష్టిలో ఉంచుకొని దేశంలోని దాదాపు 17 ప్రధాన నగరాల్లో ఈ కారును నిషేధించిన సంగతి తెలిసినదే. ఇదివరకటి తరం అంబాసిడర్ కార్లలో బిఎస్-3 (భారత్ స్టేజ్ 4) ఇంజన్‌ను ఉపయోగించేవారు. ఇది ఎక్కువ కర్భన ఉద్ఘారాలను వెల్లడిస్తుండటంతో ఈ వేరియంట్‌ను మెట్రో నగరాల్లో బ్యాన్ చేశారు.

ఈ నేపథ్యంలో, ఆధునిక కాలుష్య నిబంధనలకు లోబడి అభివృద్ధి చేసిన సరికొత్త 1.5 లీటర్ బిఎస్-4 (భారత్ స్టేజ్ 4) ఇంజన్‌తో కూడిన సరికొత్త అంబాసిడర్ కారును కొత్త పేరుతో కంపెనీ విడుదల చేయనుంది. ఈ కొత్త వేరియంట్‌ను ఇప్పటికే కొంత మంది క్యాబ్ డ్రైవర్లు, హెచ్ఎమ్ డీలర్లకు పశ్చిమ బెంగాల్‌లో ఉన్న తమ ఉత్తర్‌పరా ఫ్యాక్టరీలో కంపెనీ ప్రదర్శనకు ఉంచింది. అందులో కొందరు ఫ్యాక్టరీ టెస్ట్ ట్రాక్‌పై ఈ కారును టెస్ట్ చేశారు. ఇది తమ ఫీడ్‌‌బ్యాక్‌కు తగినట్లుగా ఉందని ఈ కార్యక్రమంలో పాల్గొన్న డ్రైవర్లు, డీలర్లు చెప్పారని కంపెనీ పేర్కొంది.

అంతకు మించిన సమాచారాన్ని, ఇంజన్ స్పెసిఫికేషన్లను, విడుదల తేది మరియు ధర తదితర విషయాల గురించి కంపెనీ వెల్లడించలేదు. ఈ కొత్త బిఎస్-4 1.5 లీటర్ డీజిల్ ఇంజన్‌తో కూడిన సరికొత్త అంబాసిడర్ జూన్ నెలాఖరు నాటికి మార్కెట్లోకి రావచ్చని గతంలో కంపెనీ అధికారి ఒకరు వెల్లడించారు. ఈ కొత్త అంబాసిడర్ కారుకు సంబంధించి ఎప్పటికప్పుడు తాజా సమాచారం తెలుగు డ్రైవ్‌స్పార్క్‌ను గమనిస్తూనే ఉండండి.