దీపావళి నాటికి మార్కెట్లోకి రానున్న ఆల్టో కె10 ఫేస్‌లిఫ్ట్!

Four Wheelers

oi-Ravi

By Ravi

Published: Thursday, August 1, 2013, 15:14 [IST]

దేశపు అగ్రగామి ప్యాసింజర్ కార్ల తయారీ కంపెనీ మారుతి సుజుకి ఇండియా ఇటీవలే విడుదల చేసిన అప్‌గ్రేడెడ్ మారుతి ఆల్టో 800 చిన్న కారుకు మంచి స్పందన లభించిన సంగతి తెలిసినదే. ఈ నేపథ్యంలో, కంపెనీ అందిస్తున్న 1000సీసీ వెర్షన్ ఆల్టో (కె10)లో కూడా ఓ రిఫ్రెష్డ్ వేరియంట్‌ను ప్రవేశపెట్టేందుకు మారుతి సుజుకి సన్నాహాలు చేస్తున్నట్లు సమాచారం. దీపావళి నాటికి ఈ కొత్త ఆల్టో కె10 విడుదలయ్యే అవకాశం ఉంది.

ఆల్టో 800 మాదిరిగానే ఆల్టో కె10లో కూడా డిజైన్, ఎక్స్టీరియర్స్, ఇంటీరియర్లలో అనేక మార్పులు చేర్పులు ఉండే అవకాశం ఉంది. ఆల్టో బ్రాండ్‌ను విస్తరించేందుకు తద్వారా ఈ బ్రాండ్ అమ్మకాలను పెంచుకునేందుకు ఆల్టో కె10 మోడల్‌ను 2010లో విడుదల చేశారు. ప్రత్యేకించి పెర్ఫామెన్స్ వెర్షన్ ఆల్టో కోరుకునే వారి కోసం ఈ వేరియంట్‌లో కె-సిరీస్ 1000సీసీ ఇంజన్‌ను ఉపయోగించారు.

ఆల్టో కె10 వేరియంట్లో అమర్చిన 1-లీటర్ కె-సిరీస్ ఇంజన్ గరిష్టంగా 6200 ఆర్‌పిఎమ్ వద్ద 68 పిఎస్‌ల శక్తిని, 3500 ఆర్‌పిఎమ్ వద్ద 90 ఎన్ఎమ్‌ల టార్క్‌ను ఉత్పత్తి చేస్తుంది. ఈ ఇంజన్ కంపెనీ కొత్తగా అభివృద్ధి చేసిన కేబుల్-టైప్ ట్రాన్సిమిషన్‌తో జతచేయబడి ఉంటుంది. కంపెనీ పేర్కొన్న సమాచారం ప్రకారం, ఆల్టో కె10 లీటరు పెట్రోలుకు 20.2 కిలోమీటర్ల మైలేజీని ఆఫర్ చేస్తుంది.
ఆల్టో కె10 13.3 సెకండ్ల వ్యవధిలో 0-100 కిలోమీటర్ల వేగాన్ని అందుకుంటుంది. పవర్ స్టీరింగ్, రిమోట్ బూట్-లిడ్ ఓపెనర్, 4.6 మీటర్ల టర్నింగ్ రేడియస్, 160 మి.మీ. గ్రౌండ్ క్లియరెన్స్ వంటి ప్రధాన ఫీచర్లు మారుతి ఆల్టో కె10 సొంతం. ఫేస్‌లిఫ్ట్ వెర్షన్ ఆల్టో కె10కు సంబంధించిన లేటెస్ట్ అప్‌డేట్స్ కోసం తెలుగు డ్రైవ్‌స్పార్క్‌ను గమనిస్తూనే ఉండండి.