జనవరి నుంచి కార్ల ధరలను పెంచనున్న మెర్సిడెస్ బెంజ్

By Ravi

Published: Friday, December 6, 2013, 15:53 [IST]

కొత్త సంత్సరంలో లగ్జరీ కార్ల ధరలు కొండెక్కి కూర్చోనున్నాయి. ఈ సెగ్మెంట్లోని దాదాపు అన్ని కార్ కంపెనీల వచ్చే జనవరి 2014 నుంచి తమ ఉత్పత్తుల ధరలను భారీగా పెంచనున్నాయి. ఇప్పటికే బిఎమ్‌డబ్ల్యూ ఇండియా, ఆడి ఇండియా కంపెనీలు వచ్చే ఏడాది ఆరంభం నుంచే ధరలు పెంచుతామని ప్రకటించిన సంగతి తెలిసినదే. తాజాగా ఈ జాబితాలోకి మెర్సిడెస్ బెంజ్ ఇండియా వచ్చి చేరింది.

వచ్చే నెల నుంచి తమ ఉత్పత్తుల ధరలను 10 శాతం వరకు పెంచుతామని మెర్సిడెస్ బెంజ్ ఇండియా ఓ ప్రకటనలో పేర్కొంది. అయితే, ధరల పెంపుకు గల కారణాలను మాత్రం కంపెనీ స్పష్టం చేయలేదు. బిఎమ్‌డబ్ల్యూ ఇండియా వచ్చే ఏడాది ఆరంభం నుంచి తమ కార్ల ధరలను 7 శాతం నుంచి 10 శాతం మేర పెంచనున్నట్లు ప్రకటించగా, జనవరి 1, 2014 నుంచి కార్ల ధరలను మోడల్‌ను బట్టి 3 శాతం నుంచి 5 శాతం మేర పెంచనున్నట్లు ఆడి ఇండియా ప్రకటించింది.

ఇది కూడా చదవండి: కొత్త కారు కొనేందుకు ఇదే సరైన సమయం..!

జర్మనీకి చెందిన లగ్జరీ కార్ కంపెనీ మెర్సిడెస్ బెంజ్ ఇండియా, దేశీయ విపణిలో తమ కాంపాక్ట్ కారు ఏ-క్లాస్ మొదలుకొని స్పోర్ట్స్ కారు ఎస్ఎల్ఎల్ ఏఎమ్‌జి వరకు విస్తృతస్థాయి ఉత్పత్తులను ఆఫర్ చేస్తోంది. భారత మార్కెట్లో కంపెనీ అందిస్తున్న లగ్జరీ కార్ల ధరల రూ.22 లక్షలు మొదలుకొని రూ.3 కోట్ల వరకు ఉన్నాయి.