ఇండియాకు రానున్న 2014 స్కొడా సూపర్బ్ సెడాన్

Car Buzz

oi-Ravi

By Ravi

Published: Thursday, April 4, 2013, 10:50 [IST]

చెక్ రిపబ్లిక్‌కు చెందిన ప్రముఖ కార్ల తయారీ కంపెనీ స్కొడా అందిస్తున్న ప్రీమియం సెడాన్ 'సూపర్బ్'లో ఓ సరికొత్త అప్‍‌గ్రేడెడ్ వెర్షన్‌ను ఆవిష్కరించింది. త్వరలో చైనాలో జరగనున్న 2013 షాంగై మోటార్ షోలో ఈ సరికొత్త 2014 స్కొడా సూపర్బ్ విడుదల కానుంది. ప్రస్తుతం మార్కెట్లో లభిస్తున్న స్కొడా సూపర్బ్‌తో పోల్చుకుంటే డిజైన్ పరంగా, ఫీచర్ల పరంగా ఎన్నో రెట్లు మెరుగ్గా ఉండేలా ఈ కొత్త వెర్షన్‌ను తీర్చిదిద్దారు. భారత్‌లో లభిస్తున్న స్కొడా సూపర్బ్‌ స్థానాన్ని రీప్లేస్ చేస్తూ ఈ కొత్త వెర్షన్‌ను విడుదల చేసే అవకాశం ఉంది.

2014 స్కొడా సూపర్బ్ ప్రీమియం కారులో బై-జెనాన్ హెడ్‌ల్యాంప్స్, కొత్త బానెట్స కొత్త గ్రిల్, కొత్త ఫ్రంట్ బంపర్, కొత్త లోగో, కొత్త ఫాగ్ ల్యాంప్స్‌తో సరికొత్త ఫ్రంట్ డిజైన్‌ను కలిగి ఉంటుంది. ఇందులో ఉపయోగించిన అల్లాయ్ వీల్స్‌ను కూడా రీడిజైన్ చేశారు. అలాగే ఈ కారు వెనుక వైపు గమనిస్తే, ఎల్ఈడి టెయిల్ ల్యాంప్స్‌తో ఇది సరికొత్త రియర్ డిజైన్‌ను కలిగి ఉంటుంది. ఇంజన్ పరంగా కూడా ఈ కారులో మార్పులు చేయటం జరిగింది. స్టార్ట్-స్టాప్ సిస్టమ్, బ్రేక్ ఎనర్జీ రీజనరేషన్ వంటి టెక్నాలజీలను ఈ కారులో ఉపయోగించారు.

కొత్త సూపర్బ్ సెడాన్‌లో 1.4 లీటర్ టిఎస్ఐ, 1.8 లీటర్ టిఎస్ఐ పెట్రోల్ ఇంజన్లను ఉపయోగించారు. డీజిల్ వెర్షన్‌లో 140 బిహెచ్‌పి 2 లీటర్ టర్బో డీజిల్ ఇంజన్, 170 బిహెచ్‌పి 2 లీటర్ టర్బో డీజిల్ ఇంజన్లను ఉపయోగించారు. 2014 స్కొడా సూపర్బ్ 6-స్పీడ్ మ్యాన్యువల్ ట్రాన్సిమిషన్, 6-స్పీడ్ డ్యూయెల్ క్లచ్ డిఎస్‌జి ఆటోమేటిక్ ట్రాన్సిమిషన్ సిస్టమ్‌లతో లభ్యం కానుంది. ఈ సరికొత్త సూపర్బ్ సెడాన్‌లో లభించే మరిన్ని అదనపు ఫీచర్ల వివరాలు ఇలా ఉన్నాయి.

• త్రీ, ఫోర్-స్పోక్ స్టీరింగ్ వీల్
• సరికొత్త ఫ్యాబ్రిక్ సీట్స్ (బేస్ వేరియంట్లలో)
• ప్రీమియం లెథర్ సీట్స్ (టాప్ ఎండ్ వేరియంట్లలో)
• ఎల్ అండ్ కె ఎడిషన్ కోసం బ్రైన్, ఐవరీ కలర్ కోడ్
• ఎలక్ట్రానిక్ సీట్ అడ్జస్టమెంట్స్
• సెంటర్ కన్సోల్‌పై జంబో బాక్స్
• ఆటోమేటిక్ పార్కింగ్ అసిస్ట్
• 6.5 ఇంచ్ టచ్ స్క్రీన్ ఇన్ఫోటైన్‌మెంట్ సిస్టమ్

ఈ కొత్త 2014 స్కొడా సూపర్బ్ తొలుతగా యూరోపియన్ మార్కెట్లలో అమ్ముడు కానుంది. అనంతరం సికెడి రూట్లో స్కొడా ఇండియా ఈ కారును విడిభాగాలుగా దిగుమతి చేసుకొని భారత మార్కెట్లో అసెంబ్లింగ్ చేసి విక్రయించే అవకాశాలున్నాయి. అయితే, ఇందుకు కొంత సమయం పట్టే ఆస్కారం ఉంది. ఈ కారుకు సంబంధించి ఎప్పటికప్పుడు తాజా సమాచారం కోసం తెలుగు డ్రైవ్‌స్పార్క్‌ను గమనిస్తూనే ఉండండి.