మూడు వారాల్లో 10,000 బుకింగ్స్ దక్కించుకున్న టాటా జెస్ట్

By Ravi

Published: Monday, September 1, 2014, 13:13 [IST]

దేశీయ ఆటోమొబైల్ దిగ్గజం టాటా మోటార్స్ ఇటీవల భారత మార్కెట్లో విడుదల చేసిన తమ తొలి కాంపాక్ట్ సెడాన్ 'టాటా జెస్ట్'కు మంచి స్పందన లభిస్తోంది. బోరింగ్ ఇండికా, ఇండిగో డిజైన్‌లకు స్వస్తి పలుకుతూ అధునాత టెక్నాలజీ, సెగ్మెంట్ ఫస్ట్ హై-ఎండ్ ఫీచర్స్ మరియు స్టయిలిష్ డిజైన్‌తో ఆఫర్ చేస్తున్న ఈ సరికొత్త టాటా జెస్ట్ కొనుగోలు దారులను చక్కగా ఆకట్టుకుంటోంది.

ఇది కూడా చదవండి: టాటా జెస్ట్ కాంపాక్ట్ సెడాన్ ఫుల్ డిటేల్స్

టాటా జెస్ట్ కాంపాక్ట్ సెడాన్‌ను మార్కెట్లోకి విడుదల చేసిన మూడు వారాల్లోనే 10,000 యూనిట్లకు పైగా బుకింగ్‌లను దక్కించుకున్నట్లు కంపెనీ ఓ ప్రకటనలో పేర్కొంది. ఎక్కువగా టాటా జెస్ట్ డీజిల్ ఏఎమ్‌టి (ఆటోమేటెడ్ మ్యాన్యువల్ ట్రాన్సిమిషన్) వేరియంట్‌కు ఎంక్వైరీలు వస్తున్నట్లు సమాచారం. అందుకే ఈ మోడల్ వెయిటింగ్ పీరియడ్ కూడా భారీగా పెరిగిపోతోంది.

టాటా జెస్ట్ పెట్రోల్ మరియు డీజిల్ ఇంజన్ ఆప్షన్లలో లభిస్తుంది. పెట్రోల్ వెర్షన్ టాటా జెస్ట్ సెడాన్‌లో కంపెనీ ఇటీవలే ఆవిష్కరించిన సరికొత్త 1.2 లీటర్, టర్బో చార్జ్డ్, రెవట్రోన్ ఇంజన్‌ను ఉపయోగించారు. ఈ ఇంజన్ గరిష్టంగా 90 పిఎస్‌ల శక్తిని, 140 ఎన్ఎమ్‌ల టార్క్‌ను ఉత్పత్తి చేస్తుంది. ఈ ఇంజన్ 5-స్పీడ్ మ్యాన్యువల్ ట్రాన్సిమిషన్‌తో అనుసంధానం చేయబడి ఉంటుంది. ఇది లీటరుకు 17.6 కి.మీ. మైలేజీనిస్తుంది. ఈ ఇంజన్ స్పోర్ట్స్, ఎకానమీ, సిటీ అనే మూడు డ్రైవింగ్ మోడ్స్‌తో లభిస్తుంది.

డీజిల్ వెర్షన్ టాటా జెస్ట్ సెడాన్‌లో ఫియట్ నుంచి గ్రహించిన 1.3 లీటర్, క్వాడ్రాజెట్ ఇంజన్‌ను ఉపయోగించారు. ఈ ఇంజన్ గరిష్టంగా 90 పిఎస్‌ల శక్తిని, 190 ఎన్ఎమ్‌ల టార్క్‌ను ఉత్పత్తి చేస్తుంది. ఈ ఇంజన్ కూడా 5-స్పీడ్ మ్యాన్యువల్ ట్రాన్సిమిషన్‌తోనే అనుసంధానం చేయబడి ఉంటుంది. ఇందులో టాప్-ఎండ్ వేరియంట్ ఆటోమేటెడ్ మ్యాన్యువల్ ట్రాన్సిమిషన్ (ఏఎమ్‌టి)తో లభిస్తుంది. ఇది లీటరుకు 23 కి.మీ. మైలేజీనిస్తుంది. లేటెస్ట్ అప్‌డేట్స్ కోసం తెలుగు డ్రైవ్‌స్పార్క్‌ను గమనిస్తూ ఉండండి.