2015 జెనీవా మోటార్ షో: హ్యుందాయ్ టక్సన్ ప్లగ్-ఇన్ హైబ్రిడ్ కాన్సెప్ట్

కొరియన్ కార్ కంపెనీ హ్యుందాయ్ అందిస్తున్న టక్సన్ ఎస్‌యూవీలో కంపెనీ సరికొత్త కాన్సెప్ట్ వాహనాన్ని ఆవిష్కరించింది. టక్సన్ ప్లాట్‌ఫామ్‌ను ఆధారంగా చేసుకొని ఓ ప్లగ్-ఇన్-హైబ్రిడ్ (పిహెచ్ఈవి) వాహనాన్ని 2015 జెనీవా మోటార్ షోలో హ్యుందాయ్ ప్రదర్శనకు ఉంచింది.

హ్యుందాయ్ టక్సన్ ప్లగ్-ఇన్-హైబ్రిడ్ కారులో 1.7 లీటర్ డీజిల్ ఇంజన్‌ను ఉపయోగించారు. ఈ ఇంజన్ గరిష్టంగా 115 పిఎస్‌ల శక్తిని ఉత్పత్తి చేస్తుంది. ఈ హైబ్రిడ్ కారులో ఓ ఎలక్ట్రిక్ మోటార్ కూడా ఉంది. ఈ మోటార్ గరిష్టంగా 68 పిఎస్‌ల శక్తిని ఉత్పత్తి చేస్తుంది. ఈ మోటార్ 10.7 కివా లిథియం అయాన్ పాలిమర్ బ్యాటరీతో నడుస్తుంది.

డీజిల్ ఇంజన్ మరియు ఎలక్ట్రిక్ మోటార్ రెండూ కలిసి గరిష్టంగా 183 పిఎస్‌ల శక్తిని, 474 ఎన్ఎమ్‌ల టార్క్‌ని ఉత్పత్తి చేస్తుంది. కేవలం లిథియం అయాన్ పాలిమర్ బ్యాటరీ సాయంతోనే ఈ కారు 50 కిలోమీటర్ల దూరం నడుస్తుంది. ఇందులోని ఇంజన్ 7-స్పీడ్ డ్యూయెల్ క్లచ్ ట్రాన్సిమిషన్‌తో అనుసంధానం చేయబడి ఉంటుంది.

హ్యుందాయ్ టక్సన్ ప్లగ్-ఇన్-హైబ్రిడ్ కారు కిలోమీటరుకు 48 గ్రాముల కన్నా తక్కువ కర్భన వ్యర్థాలను (సిఓ2) విడుదల చేస్తుందని కంపెనీ పేర్కొంది. ఈ ఎలక్ట్రిక్ మోటార్ కారు వెనుక భాగంలో అమర్చబడి ఉండి, వెనుక చక్రాలకు పవర్‌ను అందిస్తుంది. అలాగే, ఇందులోని డీజిల్ ఇంజన్ ఫ్రంట్ యాక్సిల్‌కు పవర్‌ను అందిస్తుంది.

ఈ కాన్ఫిగరేషన్ వలన కారును ఫ్రంట్ వీల్ డ్రైవ్, రియర్ వీల్ డ్రైవ్ మరియు ఆల్-వీల్ డ్రైవ్‌కి మార్చుకునేందుకు వీలవుతుంది. హ్యుందాయ్ టక్సన్ పిహెచ్ఈవి కాన్సెప్ట్ నాలుగు డ్రైవ్ మోడ్స్‌తో కూడా లభిస్తుంది. అవి -

• ఆటో: ఈ మోడ్‌లో అన్ని సిస్టమ్స్ ఆపరేట్ అయ్యి, అత్యధిక మైలేజ్ లభిస్తుంది.
• జీరో ఎమిషన్ వెహికల్: ఈ మోడ్‌లో కేవలం ఎలక్ట్రిక్ మోటార్ మాత్రమే పనిచేస్తుంది.
• ఫోర్-వీల్ డ్రైవ్: ఈ మోడ్‌లో రెండు ఇంజన్లు పనిచేస్తాయి.
• స్పోర్ట్: ఈ మోడ్‌లో రెండు ఇంజన్ల పెర్ఫార్మెన్స్ పనితీరు మెరుగ్గా ఉంటుంది.