అప్‌గ్రేడెడ్ బిఎమ్‌డబ్ల్యూ 7 సిరీస్ విడుదల: ధర, ఇతర వివరాలు

Car Buzz

oi-Ravi

By Ravi

Published: Thursday, April 25, 2013, 15:23 [IST]

జర్మన్ లగ్జరీ కార్ కంపెనీ బిఎమ్‌డబ్ల్యూ ఇండియా తమ సరికొత్త ఫేస్‌లిఫ్ట్ వెర్షన్ 'బిఎమ్‌డబ్ల్యూ 7-సిరీస్' నేడు (ఏప్రిల్ 25, 2013) మార్కెట్లో విడుదల చేసింది. దేశీయ విపణిలో బిఎమ్‌డబ్ల్యూ 7 సిరీస్ (730 ఎల్‌డి వేరియంట్) ప్రారంభ ధర రూ.92.90 లక్షలు (ఎక్స్-షోరూమ్, మహారాష్ట్ర‌)గా నిర్ణయించినట్లు కంపెనీ పేర్కొంది. గడచిన నెలలో బిఎమ్‌డబ్ల్యూ ఇండియా ఈ ఫేస్‌లిఫ్ట్ వెర్షన్ 7 సిరీస్ లగ్జరీ కారును ఓ ఛారిటీ కార్యక్రమంలో క్రికెట్ దిగ్గజం, బిఎమ్‌డబ్ల్యూ ఇండియా బ్రాండ్ అంబాసిడర్ సచిన్ టెండూల్కర్ చేతుల మీదుగా ఆవిష్కరించిన సంగతి తెలిసినదే.

దేశీయ విపణిలో 2013 బిఎమ్‌‌డబ్ల్యూ 7 సిరీస్ పెట్రోల్, డీజిల్ ఇంజన్ ఆప్షన్లతో లభ్యం కానుంది. వాటి వేరియంట్లు, ధరల వివరాలు ఇలా ఉన్నాయి:

• బిఎమ్‌‌డబ్ల్యూ 730ఎల్‌డి - రూ. 92.90 లక్షలు
• బిఎమ్‌‌డబ్ల్యూ 740ఎల్‌ఐ - రూ. 1.12 కోట్లు
• బిఎమ్‌‌డబ్ల్యూ 750ఎల్‌ఐ - రూ. 1.29 కోట్లు
• బిఎమ్‌‌డబ్ల్యూ 760ఎల్‌ఐ - రూ. 1.73 కోట్లు

(అన్ని ధరలు ఎక్స్-షోరూమ్, మహారాష్ట్ర)

సరికొత్త 2013 బిఎమ్‌డబ్ల్యూ 7 సిరీస్ కారులో రివైజ్డ్ ఫ్రంట్ డిజైన్, కొత్త ఫాగ్ ల్యాంప్స్, మరింత అప్‌రైట్ కిడ్నీ గ్రిల్, ఫుల్ అడాప్టివ్ ఎల్ఈడి హెడ్‌ల్యాంప్స్, బూట్‌లిడ్‌పై క్రోమ్ స్ట్రిప్ వంటి ఎక్స్టీరియర్ మార్పులను గమనించవచ్చు. ఇంటీరియర్లను కూడా అప్‌డేట్ చేయటం జరిగింది. ఈ కొత్త వేరియంట్లలో ఇది వరకటి ఇంజన్లనే రీట్యూన్ చేసి ఉపయోగించారు. ఈ ఇంజన్ల సామర్థ్యాలలో స్వల్పంగా మార్పులు ఉన్నాయి. 2013 బిఎమ్‌డబ్ల్యూ 7-సిరీస్ డీజిల్ ఇంజన్ సామర్థ్యాన్ని స్వల్పంగా పెంచగా, పెట్రోల్ వెర్షన్ మైలేజీని 21 శాతం మెరుగుపరచినట్లు కంపెనీ పేర్కొంది. ఈ రెండు వేరియంట్లు కూడా 8-స్పీడ్ ఆటోమేటిక్ ట్రాన్సిమిషన్ సిస్టమ్ (8 ఆటోమేటిక్ గేర్లు)తో లభిస్తాయి.