ఈకోస్పోర్ట్ వెయిటింగ్ పీరియడ్‌ను తగ్గించనున్న ఫోర్డ్

Car Buzz

oi-Ravi

By Ravi

Published: Monday, August 11, 2014, 8:49 [IST]

ఫోర్డ్ ఇండియా అందిస్తున్న కాంపాక్ట్ ఎస్‌యూవీ ఈకోస్పోర్ట్ భారత మార్కెట్లో ఇప్పటికీ హాట్ కేకుల్లా అమ్ముడుపోతున్న సంగతి తెలిసినదే. ఈ మోడల్ ఉత్పత్తికి మించి డిమాండ్ వస్తున్న నేపథ్యంలో, కంపెనీ డీలర్లు సరైన సమయంలో వీటిని కస్టమర్లకు అందజేయలేకపోతున్నారు. ఈకోస్పోర్ట్ విషయంలో సుధీర్ఘ వెయిటింగ్ పీరియడ్ పట్ల అసంతృప్తి చెందిన కొందరు కస్టమర్లు ఇతర మోడళ్లను కొనుగోలు చేసేందుకు ఆసక్తి చూపుతున్నారు.

ఈ పరిస్థితుల నేపథ్యంలో, ఫోర్డ్ ఇండియా తమ పాపులర్ ఈకోస్పోర్ట్ ఎస్‌యూవీ వెయిటింగ్ పీరియడ్ తగ్గించేందుకు గాను సన్నాహాలు ప్రారంభించింది. ఇందులో భాగంగా, చెన్నై ప్లాంట్‍‌లో ఈకోస్పోర్ట్ ఉత్పత్తి కోసం కంపెనీ మూడవ షిఫ్టును ప్రారంభించింది. ఈ ప్లాంటులో అదనపు షిఫ్టును ప్రారంభించడం వలన ఈకోస్పోర్ట్ ఉత్పత్తి పెరిగి, ఈ మోడల్ వెయిటింగ్ పీరియడ్ తగ్గే ఆస్కారం ఉందని కంపెనీ భావిస్తోంది.

దాదాపు ఏడాది క్రితం ఫోర్డ్ ఈకోస్పోర్ట్ భారత మార్కెట్లో విడుదలైంది. ప్రస్తుతం ఈ మోడల్ కోసం కస్టమర్లు 4-6 నెలల వరకూ వేచి ఉండాల్సిన పరిస్థితి నెలకొంది. ఒకానొక సందర్భంలో, ఈ మోడల్‌కు లభిస్తున్న అధిక డిమాండ్ కారణంగా కంపెనీ దీని బుకింగ్స్‌‌ను కూడా నిలిపివేసిన సంగతి తెలిసినదే. ఏదేమైనప్పటికీ, ఈ ప్లాంటులో మూడవ షిఫ్టును ప్రారంభించడంతో ఈకోస్పోర్ట్ వెయిటింగ్ పీరియడ్ తగ్గే ఆస్కారం కనిపిస్తోంది.

ఫోర్డ్ ఈకోస్పోర్ట్‌లో బేస్ వేరియంట్స్ కన్నా టాప్-ఎండ్ వేరియంట్స్‌కే ఎక్కువ డిమాండ్ లభిస్తున్నట్లు ఫోర్డ్ అధికారులు వెల్లడించారు. మిడ్-ఎండ్ వేరియంట్లకు మరియు ఈకోబూస్ట్ వేరియంట్‌కు కూడా స్పందన లభిస్తోందని వారు తెలిపారు. భారత్‌లో ఫోర్డ్ ఈకోస్పోర్ట్ మూడు ఇంజన్ వేరియంట్లలో (1.5 లీటర్ పెట్రోల్, 1.0 లీటర్ ఈకోబూస్ట్ పెట్రోల్ మరియు 1.5 లీటర్ డీజిల్) లభ్యమవుతోంది.