హోండా బ్రయో, అమేజ్‌లలో బ్రేక్ సమస్య; రీకాల్

హోండా కార్స్ ఇండియా భారత్‌లో విక్రయించిన బ్రయో హ్యాచ్‌బ్యాక్, అమేజ్ కాంపాక్ట్ సెడాన్లలో బ్రేక్ సమస్య కారణంగా వాటిని రీకాల్ చేస్తున్నట్లు కంపెనీ ప్రకటించింది. బ్రేక్ సిస్టమ్‌లో లోపం తలెత్తే నెపంతో ఈ మోడళ్లలో కొన్ని వేరియంట్లను రీకాల్ చేస్తున్నారు.

ఫిబ్రవరి 28, 2013 మరియు జనవరి 16, 2014 మధ్య కాలంలో ఉత్పత్తి అయిన హోండా బ్రయో, హోండా అమేజ్‌లలోని నాన్-ఏబిఎస్ (యాంటీ-లాక్ బ్రేకింగ్ సిస్టమ్ లేని) వేరియంట్లలో ఈ సమస్య ఉందేమోనని తనిఖీ చేసేందుకు గాను వీటిని రీకాల్ చేస్తున్నారు.

ఈ రీకాల్‌కు వర్తించే కార్లలో 15,623 బ్రయో హ్యాచ్‌బ్యాక్‌లు, 15,603 అమేజ్ సెడాన్లు ఉన్నాయని కంపెనీ ఓ ప్రకటనలో పేర్కొంది. బ్రేకింగ్ సిస్టమ్‌లో కీలకమైన ప్రపోర్షనింగ్ వాల్వ్ సమస్య వలన వీటిని రీకాల్ చేస్తున్నట్లు హోండా వివరించింది.

ఒకవేళ మీరు బ్రయో లేదా అమేజ్ కారును ఉపయోగిస్తూ ఉండి, మీ కారు కూడా ఈ రీకాల్ వర్తిస్తుందో లేదో తెలుసుకోవాలంటే సింపుల్‌గా ఇలా చేస్తే సరిపోతుంది. మీ కారు ఛాస్సిస్ నెంబర్‌ను నోట్ చేసుకొని (మీ వాహన రిజిస్ట్రేషన్ బుక్‌/పేపర్‌లో దీనిని చూడొచ్చు), హోండా కార్స్ ఇండియా అఫీషియల్ వెబ్‌సైట్ https://www.hondacarindia.com లో ఇచ్చిన కస్టమర్ అలెర్ట్ లింక్‌పై క్లిక్ చేసిన తర్వాత అందులో మీ కార్ చాస్సిస్ నెంబర్‌ను ఎంటర్ చేస్తే, మీ కారు కూడా రీకాల్‌కు వర్తిస్తుందో లేదో ఇట్టే తెలిసిపోతుంది.