మెర్సిడెస్ బెంజ్ సి-క్లాస్ సెలబ్రేషన్ ఎడిషన్ విడుదల; ధర, వివరాలు

అత్యంత పాపులర్ అయిన సి 220 సిడిఐ వేరియంట్‌ను ఆధారంగా చేసుకొని ఈ మెర్సిడెస్ బెంజ్ సి-క్లాస్ సెలబ్రేషన్ ఎడిషన్ తయారు చేశారు. భారత మార్కెట్లో కేవలం 500 యూనిట్ల సెలబ్రేషన్ ఎడిషన్ సి-క్లాస్ కార్లను మాత్రమే విక్రయించనున్నారు.

ఈ స్పెషల్ ఎడిషన్‌కు ఏఎమ్‌జి కిట్‌ను జోడించారు. ఇందులో భాగంగా కొత్త బంపర్స్, సైడ్ స్కర్ట్స్, స్మోక్డ్ ల్యాంప్స్, 5-స్పోక్ 17 ఇంచ్ అల్లాయ్ వీల్స్ వంటి కాస్మోటిక్ మార్పులతో సి-క్లాస్‌ను అప్‌గ్రేడ్ చేశారు.

సి 220 సిడిఐ వేరియంట్‌కు ఏఎమ్‌జి కిట్‌ను జోడించటం వలన ఇది రెగ్యులర్ వెర్షన్ సి-క్లాస్ కన్నా భిన్నంగా కనిపించడమే కాకుండా, దీనికి సి63 ఏఎమ్‌జి వంటి లుక్‌నిస్తుంది.

ఇంటీరియర్ అప్‌గ్రేడ్స్ విషయానికి వస్తే, బ్లూ కలర్ దారంతో కుట్టిన ఆల్కాంట్రా లెథర్ సీట్స్, ఇంటీరియర్లపై సిల్వర్ ఫినిషింగ్, ఫుల్ కలర్ ఎల్ఈడి డిస్‌ప్లే వంటి మార్పులు చేర్పులు ఉన్నాయి.

సెలబ్రేషన్ ఎడిషన్ సి-క్లాస్‌లో యాంత్రిక పరంగా ఎలాంటి మార్పులు లేవు. సి 220 సిడిఐలో ఉపయోగించిన 2143సీసీ ఇంజన్‌నే ఇందులోను ఉపయోగించారు. ఇది 170 పిఎస్‌ల శక్తిని, 400 ఎన్ఎమ్‌‌ల టార్క్‌ను ఉత్పత్తి చేస్తుంది. ఈ ఇంజన్ 7-స్పీడ్ ఆటోమేటిక్ గేర్‌బాక్సుతో అనుసంధానం చేయబడి ఉంటుంది.

భారత మార్కెట్లో మెర్సిడెస్ బెంజ్ సి-క్లాస్ సెలబ్రేషన్ ఎడిషన్ ధర 39.16 లక్షలు (ఎక్స్-షోరూమ్, ముంబై)గా నిర్ణయించారు.