వేలంలో 1.35 మిలియన్ డాలర్ల ధర పలికిన 1969 ఈజీ రైడర్ బైక్

Off Beat

oi-Ravi

By Ravi

Published: Monday, October 20, 2014, 17:50 [IST]

పాపులర్ హాలీవుడ్ చిత్రం 'ఈజీ రైడర్' (1969)లో పీటర్ ఫోండా నడిపిన కస్టమైజ్డ్ చోపర్-స్టయిల్ హ్యార్లీ డేవిడ్‌సన్ మోటార్‌సైకిల్ వేలంలో అత్యధిక వెల పలికింది. గడచిన వారాంతంలో నిర్వహించిన వేలంలో ఈ బైక్ 1.35 మిలియన్ డాలర్లకు అమ్ముడుపోయింది.

అమెరికా జాతీయ జెండా థీమ్‌లో పెయింట్ చేసిన ఈ 'కెప్టెన్ అమెరికా' బైక్‌ను ఇద్దరు ఆఫ్రికన్-అమెరికన్ బైక్ బిల్డర్స్ క్లిఫ్ వాగ్స్ మరియు బెన్ హార్డీలు డిజైన్ చేసి, నిర్మించారు. అయితే, ఫోండా అందించిన సూచనల ఆధారంగానే దీనిని తయారు చేశారు.

ఈజీ రైడర్ అనేది ఓ క్లాసిక్ అమెరికన్ రోడ్ మూవీ. ఓపెన్ రోడ్ ఫ్రీడమ్‌ను అనుభవించేందుకు గాను ఇద్దరు బైకర్స్ (పీటర్ ఫోండా, డెన్నిస్ హోపర్) దేశం మొత్తం ట్రావెల్ చేస్తారు. ఈ చిత్రంలోని పీటర్ ఫోండా కోసం ఓ హ్యార్లీ డేవిడ్‌సన్ బైక్‌ను ఇలా ప్రత్యేకంగా తయారు చేశారు.

ఈ చిత్రంలో ఫోండా కెప్టెన్ అమెరికా పాత్రను పోషించారు. అతని పాత్ర మాదిరిగానే తాను నడిపిన బైక్ కూడా మోటార్‌సైకిల్ చరిత్రలో మంచి ప్రాచుర్యాన్ని దక్కించుకుంది. వాస్తవానికి ఈ చిత్రంలో హ్యార్లీ డేవిడ్‌సన్ ఎఫ్ఎల్‌హెచ్ పోలీస్ బైక్‌ల నుంచి తయారు చేసిన రెండు కెప్టెన్ అమెరికా చోపర్లను ఉపయోగించారు. కాగా.. ఇందులో ఒకటి చిత్ర షూటింగ్ సమయంలో నాశనమైపోగా, మరొకటి మూవీ సెట్ నుంచి మాయమైపోయింది.

అయితే, ఈ చిత్రం 30న వార్షికోత్సవాన్ని జరుపుకునేందుకు గాను ఫోండా సాయంతో, ఒరిజినల్ బైక్‌లను క్రియేట్ చేసిన వారు తిరిగి అచ్చం అలానే ఉండే కెప్టెన్ అమెరికా మోటార్‌సైకిల్‌ను తయారు చేశారు. ఆ తర్వాత దీనిని కొంత కాలం పాటు హ్యార్లీ డేవిడ్‌సన్ మ్యూజియంలో ఉంచారు.

కాగా.. ప్రస్తుతం వేలంలో విక్రయించిన బైక్ మాత్రం, ఈ చిత్రం ముగింపు సమయంలో క్రాష్ సీన్ (యాక్సిడెంట్) కోసం ఉపయోగించబడినది. లాస్ ఏంజిల్స్‌లో ఉన్న కలాబసాస్‌లోని ప్రొఫైల్స్ ఇన్ హిస్టరీ ఆక్షన్ రూమ్‌లో హాలీవుడ్ మెమరబిలియా సేల్‌లో భాగంగా విక్రయించారు.