మహీంద్రా టూవీలర్స్ నుంచి 150సీసీ స్కూటర్

Bike Buzz

oi-Ravi

By Ravi

Published: Friday, January 9, 2015, 16:17 [IST]

మహీంద్రా గ్రూపుకి చెందిన ద్విచక్ర వాహన విభాగం మహీంద్రా టూ వీలర్స్, ప్రతి ఆరు నెలలకు ఓ కొత్త మోడల్‌ను మార్కెట్లో విడుదల చేయాలని లక్ష్యంగా పెట్టుకుంది. ఇందులో భాగంగానే, కంపెనీ ఈ ఏడాది తమ సరికొత్త 300సీసీ మోజో మోటార్‌సైకిల్‌తో పాటుగా ఓ కొత్త 150సీసీ స్కూటర్‌ను కూడా మార్కెట్లో విడుదల చేయాలని భావిస్తోంది.

ప్రతి ఆరు నెలలకు కనీసం ఓ కొత్త మోడల్‌ను విడుదల చేస్తామని తాము గతంలోనే సూచించామని, తాము ఇందుకు కట్టుబడి ఉంటామని మహీంద్రా టూవీలర్స్ కస్టమర్‌కేర్ వైస్ ప్రెసిడెంట్ ధర్మేంద్ర మిశ్రా తెలిపారు. పూనేలోని తమ రీసెర్చ్ అండ్ డెవలప్‌మెంట్ బృందం అనేక సెగ్మెంట్లను పరిగణలోకి తీసుకుంటుందని, ఇందులో ఓ 150సీసీ స్కూటర్ కూడా ఉందని ఆయన చెప్పారు.

హైదరాబాద్ మార్కెట్లో మహీంద్రా కొత్త 110సీసీ స్కూటర్ గస్టోని విడుదల చేసిన సందర్భంగా ఆయన ఈ వ్యాఖ్యలు చేశారు. హైదరాబాద్ మార్కెట్లో మహీంద్రా గస్టో స్కూటర్ రెండు వేరియంట్లలో లభ్యమవుతుంది. రాష్ట్ర విపణిలో గస్టో హెచ్ఎక్స్ ధర రూ.48,100 లుగా ఉంటే, గస్టో విఎక్స్ ధర రూ.50,100 లుగా ఉంది (అన్ని ధరలు ఎక్స్-షోరూమ్, హైదరాబాద్).

ఇదిలా ఉండగా.. మహీంద్రా టూవీలర్స్ ఫ్రాన్స్‌కి చెందిన ప్యూజో కంపెనీలోని దిచక్ర వాహన యూనిట్‌లో వాటాల కొనుగోలు ప్రక్రియను ఈ ఏడాది ఫిబ్రవరి నాటికి పూర్తి చేయాలని కంపెనీ భావిస్తోంది. మహీంద్రా టూవీలర్స్ మొత్తం 54 బిలియన్ యూరోలు చెల్లించి, ప్యూజో మోటార్‌సైకిల్స్‌లో 51 శాతం వాటాలను కొనుగోలు చేయనుంది. వీరిద్దరి భాగస్వామ్యంతో భవిష్యత్తులో మరిన్ని మోడళ్లు మార్కెట్లో విడుదలయ్యే అవకాశం ఉంది.