అడవుల్లో అయినా, రోడ్లపైనైనా తిరుగులేని తిరుగులేని బైక్.. ఒక్కసారి ఎక్కారంటే దిగాలనిపించదు

బ్రిటిష్ క్లాసిక్ బైక్ తయారీదారు ట్రయంఫ్ (Triumph), భారతీయ దిగ్గజం బజాజ్ భాగస్వామ్యంతో విడుదల చేసిన స్క్రాంబ్లర్ 400 X ఒక సెన్సేషన్. అయితే, తాజాగా 2026 మోడల్‌లో ఒక అనూహ్యమైన మార్పు చోటుచేసుకుంది. 400సీసీ కేటగిరీలో ఉండాల్సిన ఈ బైక్, ఇప్పుడు 350సీసీ ఇంజిన్‌తో మన ముందుకు వచ్చింది. ఇంజిన్ తగ్గినా, మజా మాత్రం తగ్గలేదనేది ఈ బైక్ రైడ్ చేసిన వారి మాట. మరి ఈ మార్పు ఎందుకు జరిగింది? పర్ఫార్మెన్స్ ఎలా ఉంది? అన్న ఆసక్తికర విషయాలు రివ్యూలో చూద్దాం.

ఈ మార్పుకు అసలు కారణం ఏంటి?
భారత ప్రభుత్వం సెప్టెంబర్ 2025లో అమల్లోకి తెచ్చిన జీఎస్టీ 2.0 సంస్కరణలు వాహన రంగాన్ని ఒక్కసారిగా కుదిపేశాయి. ముఖ్యంగా మోటార్ సైకిళ్ల విషయానికి వస్తే.. 350సీసీ లోపు ఉన్న బైక్‌లపై 18 శాతం పన్ను విధిస్తుండగా, ఆ మార్క్ దాటిన బైక్‌లపై ఏకంగా 40 శాతం పన్ను విధిస్తున్నారు. ట్రయంఫ్ 400 సిరీస్ బైక్స్ అన్నీ 398సీసీ ఇంజిన్‌తో ఉండటంతో వాటి ధర విపరీతంగా పెరిగే అవకాశం ఏర్పడింది. కస్టమర్లపై ఆ భారం పడకుండా ఉండాలని, బజాజ్-ట్రయంఫ్ కలిసి ఇంజిన్ కెపాసిటీని 349సీసీకి తగ్గించాలని నిర్ణయించాయి. అలా పుట్టుకొచ్చిందే ఈ 2026 ఎడిషన్ ట్రయంఫ్ రేంజ్.

ఇంజిన్ మార్పులు - టెక్నికల్ డీటెయిల్స్
కొత్త 349సీసీ ఇంజిన్ కోసం కంపెనీ పాత 398సీసీ ఇంజిన్‌నే రీ-డిజైన్ చేసింది. బోర్ (Bore) 89mm అలాగే ఉంచి, స్ట్రోక్ (Stroke)ని 64mm నుంచి 56.1mm కి తగ్గించారు. దీనివల్ల పవర్ అవుట్‌పుట్‌లో స్వల్ప మార్పులు వచ్చాయి. స్క్రాంబ్లర్ 400 X ఇప్పుడు 37hp పవర్, 32Nm టార్క్‌ను ఉత్పత్తి చేస్తుంది. పాత మోడల్‌తో పోలిస్తే ఇది 3hp పవర్, 5.5Nm టార్క్ తక్కువ. కానీ, లిక్విడ్ కూలింగ్ టెక్నాలజీ వల్ల ఇంజిన్ స్మూత్‌నెస్‌లో ఎలాంటి లోటు రాలేదు.

డిజైన్, లుక్స్
బైక్ చూడటానికి పాత స్క్రాంబ్లర్ 400 X లాగే ఉంటుంది. బాడీ ప్యానెల్స్, హెడ్‌లైట్, ట్యాంక్ డిజైన్ వంటి వాటిలో మార్పులు చేయలేదు. ఆశ్చర్యకరంగా 400 X అనే బ్యాడ్జింగ్‌ను కూడా అలాగే ఉంచారు. కానీ మీరు ఇంజిన్ కేసింగ్ మీద నిశితంగా గమనిస్తే TR 400 అనే పేరు నుంచి 400ని తొలగించారు. అంటే పేరులో 400 ఉన్నా, మనసులో మాత్రం 350 అని అర్థం. ఈ బైక్‌లో కంపెనీ ఒక ముఖ్యమైన ఫీచర్‌ను తొలగించింది. అదే ఇమ్మొబిలైజర్. ఇది సేఫ్టీ పరంగా కొంత లోటు అని చెప్పాలి, కానీ ధరను అదుపులో ఉంచేందుకు ఇలాంటి నిర్ణయాలు తప్పలేదనిపిస్తోంది.

రైడింగ్ అనుభవం ఎలా ఉంది?
బెంగళూరు వీధుల్లో ఈ కొత్త 350సీసీ స్క్రాంబ్లర్‌ను నడిపినప్పుడు కొన్ని స్పష్టమైన మార్పులు కనిపించాయి. పాత బైక్ ఉన్నంత స్పీడ్ గా ఇది దూసుకుపోదు. ముఖ్యంగా లో-ఎండ్ నుంచి మిడ్-రేంజ్ కి వెళ్ళేటప్పుడు పవర్ కొంత తగ్గినట్లు అనిపిస్తుంది. హైవే మీద 100 కిలోమీటర్ల వేగాన్ని అందుకోవడానికి మునుపటి కంటే కొంచెం ఎక్కువ సమయం పడుతుంది. అలాగే ఇంజిన్ సౌండ్ లో ఆ గంభీరమైన లో-పిచ్ నోట్స్ తగ్గి, కొంచెం ష్రిల్ సౌండ్ వినిపిస్తోంది. అయితే, సస్పెన్షన్ మాత్రం అద్భుతంగా ఉంది. గుంతల రోడ్ల మీద కూడా స్క్రాంబ్లర్ తన రాజసాన్ని ప్రదర్శిస్తుంది.

ఎవరూ కొనాలి?
మీరు పాత 400సీసీ ట్రయంఫ్‌ను బాగా నడిపి అలవాటు పడి ఉంటే, ఈ కొత్త వర్షన్ మీకు కొంచెం నిరాశ కలిగించవచ్చు. కానీ, తొలిసారి ట్రయంఫ్ బ్రాండ్‌లోకి అడుగుపెట్టే వారికి, తక్కువ ధరలో ప్రీమియం బైక్ కావాలనుకునే వారికి ఇది బెస్ట్ ఆప్షన్. ట్యాక్స్ బెనిఫిట్ వల్ల ధర భారీగా తగ్గింది. పనితీరులో స్వల్ప తేడా ఉన్నప్పటికీ, ఒక ట్రయంఫ్ బైక్ ఇచ్చే హుందాతనం, క్వాలిటీ, కంట్రోల్ ఇందులో పుష్కలంగా ఉన్నాయి. ఒక్క మాటలో చెప్పాలంటే.. ఇది ట్యాక్స్‌కు తలవంచిన ట్రయంఫ్, కానీ రైడర్ మనసును మాత్రం గెలుచుకుంది.