Bajaj Chetak C25 Review : సింగిల్ ఛార్జ్‎తో వారం మొత్తం తిరగొచ్చు..చేతక్ C25 రేంజ్ చూస్తే షాక్ అవ్వాల్సిందే

Bajaj Chetak C25 Review : భారతదేశపు ఐకానిక్ స్కూటర్ బ్రాండ్ బజాజ్ చేతక్ మరోసారి సరికొత్త అవతారంలో మన ముందుకు వచ్చింది. ఒకప్పుడు ప్రతి మధ్యతరగతి ఇంటి ముందు కనిపించిన చేతక్ ఇప్పుడు ఎలక్ట్రిక్ రూపంలో మార్కెట్‌ను ఏలుతోంది. తాజాగా బజాజ్ ఆటో తన ఎలక్ట్రిక్ పోర్ట్‌ఫోలియోను విస్తరిస్తూ చేతక్ C25 (Chetak C25) మోడల్‌ను విడుదల చేసింది.

ఇది ప్రత్యేకంగా సిటీలో తిరిగే వారిని, తక్కువ దూర ప్రయాణాలు చేసే వారిని దృష్టిలో ఉంచుకుని రూపొందించిన మిడ్-స్పీడ్ స్కూటర్. ఈ స్కూటర్‌ ఫీచర్లు, పనితీరు, ప్రాక్టికాలిటీ ఎలా ఉందో ఈ రివ్యూలో చూద్దాం.

బజాజ్ చేతక్ C25 చూడటానికి పాతకాలపు రెట్రో స్టైల్‌ను గుర్తుకు తెస్తుంది, కానీ ఇందులో ఉన్న ఫీచర్లు మాత్రం పూర్తిగా హైటెక్. ఈ స్కూటర్ మొత్తం ఆరు రంగులలో లభిస్తుంది. ఇవి యువతను బాగా ఆకట్టుకుంటాయి. దీని బాడీ మొత్తం మెటల్‌తో తయారు చేయడం విశేషం.

ప్రస్తుతం వస్తున్న చాలా ఎలక్ట్రిక్ స్కూటర్లు ప్లాస్టిక్ బాడీతో వస్తుంటే, బజాజ్ మాత్రం తన పాత మన్నికను కాపాడుకుంటూ లోహపు బాడీని అందించింది. దీనివల్ల చిన్నచిన్న దెబ్బలకు స్కూటర్ త్వరగా పాడవ్వదు. ముందు భాగంలో ఉండే రౌండ్ ఎల్ఈడీ హెడ్ ల్యాంప్, సిగ్నేచర్ చేతక్ లోగో దీనికి ఒక ప్రీమియం లుక్‌ను ఇస్తాయి.

కంఫర్ట్, స్టోరేజ్
లోపలి భాగాన్ని పరిశీలిస్తే.. చేతక్ C25 చాలా ఆచరణాత్మకంగా ఉంది. సీటు కింద 25 లీటర్ల బూట్ స్పేస్ ఇచ్చారు. ఇందులో మీరు ఫుల్ ఫేస్ హెల్మెట్‌ను లేదా ఇంటికి అవసరమైన కిరాణా సామాగ్రిని సులభంగా పెట్టుకోవచ్చు. లెగ్‌రూమ్ కూడా చాలా విశాలంగా ఉంది, కాబట్టి పొడవుగా ఉన్న వారు కూడా ఇబ్బంది లేకుండా కూర్చోవచ్చు.

వెనుక కూర్చునే ప్రయాణికుడికి సౌకర్యంగా ఉండేలా వెడల్పాటి గ్రాబ్ హ్యాండిల్, ఇంటిగ్రేటెడ్ ఫుట్‌రెస్ట్‌లు ఉన్నాయి. రద్దీగా ఉండే సిటీ ట్రాఫిక్‌లో ఈ స్కూటర్ బరువు కేవలం 107 కిలోలు మాత్రమే ఉండటం వల్ల, దీనిని హ్యాండిల్ చేయడం చాలా సులభం.

బ్యాటరీ, రేంజ్
చేతక్ C25 లో 2.25 kWh సామర్థ్యం గల బ్యాటరీని అమర్చారు. దీనిని ఫ్లోర్‌బోర్డ్‌లో పెట్టడం వల్ల స్కూటర్ బ్యాలెన్స్ చాలా బాగుంటుంది. కంపెనీ క్లెయిమ్ ప్రకారం ఇది ఒక్కసారి ఛార్జ్ చేస్తే 113 కిలోమీటర్ల రేంజ్ ఇస్తుంది, కానీ సాధారణంగా రోడ్లపై వాడినప్పుడు సుమారు 90 నుండి 95 కిలోమీటర్ల వరకు రేంజ్ని ఆశించవచ్చు.

ఈ స్కూటర్ టాప్ స్పీడ్ గంటకు 55 కిలోమీటర్లు. ఇది తక్కువ అనిపించవచ్చు కానీ, సిటీలో, గల్లీల్లో తిరగడానికి ఇది సరిపోతుంది. అతి ముఖ్యమైన విషయం ఏమిటంటే, కేవలం 2 గంటల 25 నిమిషాల్లోనే 80 శాతం ఛార్జింగ్ పూర్తవుతుంది.

టెక్ ప్యాక్, స్మార్ట్ ఫీచర్లు
బజాజ్ ఇందులో టెక్ ప్యాక్ అనే అదనపు ఆప్షన్‌ను కూడా ఇస్తోంది. దీనిని తీసుకుంటే మీకు స్పోర్ట్ మోడ్ అందుబాటులోకి వస్తుంది, ఇది స్కూటర్‌ను వేగంగా దూసుకుపోయేలా చేస్తుంది. అలాగే ఇందులో హిల్ హోల్డ్ అసిస్ట్ అనే ఫీచర్ ఉంది, ఇది ఘాట్ రోడ్లపై లేదా వంతెనలపై స్కూటర్ వెనక్కి జారిపోకుండా ఆపుతుంది.

ఆకస్మికంగా బ్రేక్ వేసినప్పుడు వెనుక లైట్లు బ్లింక్ అయ్యే పానిక్ లాంప్ ఫంక్షన్ భద్రతను పెంచుతుంది. ఎల్సీడీ ఇన్స్ట్రుమెంట్ క్లస్టర్, ఫోన్ ఛార్జింగ్ కోసం యూఎస్‌బీ పోర్ట్ వంటి ప్రాథమిక అవసరాలన్నీ ఇందులో ఉన్నాయి.