డబుల్ ధమాకా.. X440 T ఎగ్జాస్ట్ సౌండ్ వింటే కిక్కే కిక్కు..పాత హార్లే జీన్స్‌తో కొత్త హార్లే

400సీసీ మోటార్‌సైకిల్ సెగ్మెంట్ ఇప్పుడు 150సీసీ బైక్‌లంత విస్తృతంగా మారుతోంది. ఈ పోటీలో తమ స్థానాన్ని మరింత బలంగా చేసుకోవడానికి హీరో మోటోకార్ప్ (Hero MotoCorp), హార్లే-డేవిడ్‌సన్ (Harley-Davidson) భాగస్వామ్యంలో కొత్త X440 T మోడల్ మార్కెట్‌లోకి వచ్చింది.

పాత X440 మోడల్‌ను ఆధారంగా చేసుకుని, దాన్ని మరింత మెరుగుపరుస్తూ.. దాదాపు 72 ప్రత్యేక మార్పులతో ఈ కొత్త మోడల్‌ను తీసుకురావడం నిజంగా అభినందనీయం. స్టైలింగ్, రైడింగ్ అనుభవం రెండింటినీ మెరుగుపరిచే లక్ష్యంతో ఈ కొత్త మోడల్‌ను రూపొందించారు.

X440 T డిజైన్ క్లాసిక్ హార్లే-డేవిడ్‌సన్ ఫీల్‌ను అందిస్తుంది. ముందు భాగంలో ప్రత్యేకమైన DRL లతో కూడిన రౌండ్ LED హెడ్‌ల్యాంప్ రోడ్‌స్టర్ లుక్‌ను పెంచుతుంది. పాత మోడల్‌లో విమర్శలపాలైన ఓపెన్ వైరింగ్ సమస్యను ఈ కొత్త మోడల్‌లో పరిష్కరించడం వలన బైక్ మరింత నీట్‌గా కనిపిస్తుంది.

మెటల్ ఫెండర్‌లు, ఐకానిక్ హార్లే-డేవిడ్‌సన్ XR 1200 నుంచి ప్రేరణ పొందిన ఫ్యూయల్ ట్యాంక్ గ్రాఫిక్స్ దీని స్టైల్‌ను పెంచుతాయి. బ్రేకింగ్ కోసం 320ఎంఎం ఫ్రంట్ డిస్క్ బ్రేక్, ముందు భాగంలో 43ఎంఎం అప్-సైడ్-డౌన్ ఫోర్క్‌లు, వెనుక భాగంలో 7-దశల సర్దుబాటుతో కూడిన గ్యాస్-ఛార్జ్డ్ ట్విన్ షాక్ అబ్జార్బర్‌లు స్థిరమైన హ్యాండ్లింగ్‌ను అందిస్తాయి.

ఈ బైక్‌లో అతిపెద్ద మార్పులలో ఒకటి దాని అప్డేటెడ్ ఎగ్జాస్ట్ సిస్టమ్, ఇది ఇప్పుడు మెరుగైన ఉష్ణ నిర్వహణ కోసం హీట్ షీల్డ్‌తో వచ్చింది. రైడర్‌లకు పొడవైన టూరింగ్ సీటు చాలా సౌకర్యంగా ఉంది.

గోవాలో 60-70 కి.మీ దూరం టెస్ట్ రైడ్ చేసినప్పుడు ఈ సీటు హైవేలు, కచ్చా రోడ్ల మీద కూడా మంచి సౌకర్యాన్ని అందించింది. వెడల్పైన హ్యాండిల్‌బార్ సౌకర్యవంతమైన రైడింగ్ పొజిషన్‌ను ఇస్తుంది. అంతేకాక సాంప్రదాయ మిర్రర్ల స్థానంలో వచ్చిన బార్-ఎండ్ మిర్రర్‌లు అద్భుతమైన వ్యూ ఇస్తూ, బైక్ స్టైల్‌ను మరింత పెంచాయి.

హార్లే-డేవిడ్‌సన్ X440 T లో 440సీసీ, సింగిల్-సిలిండర్, ఎయిర్, ఆయిల్-కూల్డ్ ఇంజన్ ఉంది. 6,000 rpm వద్ద 27 bhp పవర్ ఉత్పత్తి చేస్తుంది. 4,000 rpm వద్ద 38 Nm పీక్ టార్క్‌ను అందిస్తుంది.

ఈ ఇంజన్ బలం దాని లో లెవల్ టార్క్. ఇది మొదటి గేర్‌లలో చాలా బలంగా ఉంటుంది. దీనివల్ల స్పీడ్ బ్రేకర్లు,గుంతల గుండా సులభంగా వెళ్ళడానికి వీలు కల్పిస్తుంది. ఈ బైక్ బరువు 192 కిలోలు ఉన్నప్పటికీ, స్ట్రాంగ్ స్టీల్ ట్రాలిస్ ఫ్రేమ్ కారణంగా ఇది చురుకుగా అనిపిస్తుంది. వెనుక ABS ని ఆఫ్ చేసుకునే సదుపాయం కూడా ఉండటం రైడర్లకు ఒక ప్లస్ పాయింట్.

గోవాలోని రద్దీ రోడ్లు, చిన్న సందులు, హైవేలపై ఈ బైక్‌ను టెస్ట్ చేసినప్పుడు X440 T అద్భుతంగా పని చేసింది. ట్రాఫిక్‌లో కూడా ఇంజన్ వేడెక్కడం కనిపించలేదు. ఇది సులభంగా ట్రాఫిక్‌లో దూసుకుపోతుంది. హైవేలపై 130 kmph వేగాన్ని సునాయాసంగా చేరుకోగలిగింది.

అయితే స్థిరమైన, సౌకర్యవంతమైన ప్రయాణానికి 100-110 kmph వేగం అనువైనది. 120 kmph కంటే ఎక్కువ వేగంతో స్వల్పంగా అస్థిరత కనిపించినా, మొత్తం మీద ఇది పాత మోడల్ కంటే మెరుగైన అనుభవాన్ని ఇచ్చింది. ప్లాస్టిక్ సైడ్ ప్లేట్‌లను మెటల్‌తో మార్చడం వంటి చిన్న మార్పుల ద్వారా శబ్దం తగ్గి, బైక్ క్వాలిటీ పెరిగింది.

హార్లే-డేవిడ్‌సన్ X440 T అనేక ముఖ్యమైన అప్‌డేట్‌లతో, ఫీచర్-ప్యాక్డ్ మోటార్‌సైకిల్‌గా నిరూపించబడింది. స్విచ్ చేయగల ABS, స్విచ్ చేయగల ట్రాక్షన్ కంట్రోల్, డిజిటల్ ఇన్స్ట్రుమెంట్ క్లస్టర్‌తో పాటు రైడింగ్ మోడ్‌లు దీనికి మోడ్రన్ ఆకర్షణను ఇస్తున్నాయి. రోజువారీ ప్రయాణాలకు, నమ్మదగిన రెట్రో రోడ్‌స్టర్‌ను కోరుకునే వారికి ఇది సరైన ఎంపిక.

దీని ధర రూ.2,79,500 (ఎక్స్-షోరూమ్) నుంచి మొదలవుతుంది, ఇది ఈ విభాగంలో పోటీని పెంచుతుంది. హార్లే-డేవిడ్‌సన్ X440 T ఇతర వేరియంట్లు X440 వివిడ్ రూ.2,34,500, X440 S రూ.2,54,900 ధరలకు అందుబాటులో ఉన్నాయి. ఈ సెగ్మెంట్‌లో ఇది గట్టి పోటీని ఇస్తుంది.