River Indie Gen 3 ఎలక్ట్రిక్ స్కూటర్ ఎలా ఉంది? కొనవచ్చా, లేదా? ఫుల్‌ రివ్యూ చూసి డిసైడ్‌ అవ్వండి

రివర్ ఇండి మూడో జనరేషన్ (River Indie Gen 3) భారత ఎలక్ట్రిక్ స్కూటర్ మార్కెట్‌లో ఇతర స్కూటర్లతో పోలిస్తే ఎప్పుడూ భిన్నమైన దారిలో ప్రయాణిస్తోంది. ఎక్కువగా టచ్‌స్క్రీన్‌లు, కనెక్టెడ్ ఫీచర్లు, డిజిటల్ గిమ్మిక్స్‌పై ఆధారపడే పోటీదారుల మధ్య, ఈ బెంగళూరు-ఆధారిత స్కూటర్ మాత్రం పూర్తిగా ప్రాక్టికాలిటీ, యుటిలిటీ, రియల్-వరల్డ్ ఉపయోగంపై దృష్టి పెట్టింది. 2023లో మొదటిసారి మార్కెట్‌లోకి వచ్చిన ఈ స్కూటర్ ఇప్పుడు మూడవ జనరేషన్‌కి చేరుకుంది. అదే Gen 3 అప్‌డేట్. ఈ కొత్త River Indie Gen 3 వెర్షన్‌లో కంపెనీ తన యుటిలిటీ ఫిలాసఫీని ఇంకా మెరుగుపరిచింది. బయట నుంచి చూస్తే అదే ప్రత్యేకమైన, కొంచెం భిన్నమైన డిజైన్ కొనసాగుతున్నప్పటికీ, లోపల మాత్రం గణనీయమైన మెకానికల్ మార్పులు చేశారు.

దీని వల్ల రైడింగ్ అనుభవం మరింత మెరుగ్గా, ప్రాక్టికల్‌గా మారింది. ధర విషయానికి వస్తే ఇది సుమారు రూ.1.46 లక్షల (ఎక్స్-షోరూమ్, బెంగళూరు) రేంజ్‌లో ఉండటంతో ప్రీమియం ఎలక్ట్రిక్ స్కూటర్ సెగ్మెంట్‌లో నిలుస్తోంది. ఈ స్కూటర్ Bajaj Chetak, TVS iQube, Ather Rizta వంటి మోడళ్లతో పోటీ పడుతున్నప్పటికీ, తనదైన యుటిలిటీ క్యారెక్టర్‌తో ప్రత్యేకంగా నిలుస్తోంది.

ఈ వెర్షన్‌లో కొత్త ఫీచర్లు ఏంటి?
ఇతర స్కూటర్లు ఎక్కువగా ఫీచర్లపై ఫోకస్ చేస్తే, రివర్ ఇండి మాత్రం నిజ జీవిత వినియోగంలో ఎంత సౌకర్యంగా ఉంటుంది అన్నదానిపై దృష్టి పెట్టింది. ఈ Gen 3 అప్‌డేట్‌లో ప్రధాన మార్పు డ్రైవ్‌ట్రెయిన్‌లో కనిపిస్తుంది. ముందుగా ఉన్న బెల్ట్ డ్రైవ్‌ను మార్చి ఇప్పుడు చైన్ డ్రైవ్‌ను అందించారు. ఈ కొత్త చైన్-స్ప్రాకెట్ సెటప్ సుమారు 20,000 కిలోమీటర్ల వరకు పనిచేస్తుందని కంపెనీ చెబుతోంది.

గత బెల్ట్ సిస్టమ్‌తో పోలిస్తే ఇది రెండు రెట్లు ఎక్కువ జీవితకాలం ఇవ్వగలదని అంటున్నారు. అంతేకాదు, పవర్ ట్రాన్స్‌మిషన్ మరింత సమర్థవంతంగా ఉండటంతో రైడింగ్ సమయంలో స్కూటర్ మరింత త్వరగా స్పందిస్తుంది. ఈ చైన్ సిస్టమ్‌ను సులభంగా మెయింటైన్ చేయడానికి ప్రత్యేక కవర్, డిటాచబుల్ ప్యానెల్ కూడా ఇచ్చారు. ఇంకో ముఖ్యమైన అప్‌డేట్ హిల్-హోల్డ్ అసిస్ట్ ఫీచర్. ఎత్తైన రోడ్లపై స్కూటర్ వెనక్కి జారిపోకుండా సేఫ్‌గా చేస్తుంది.

అలాగే కొత్త టైర్లు గ్రిప్‌ను పెంచేలా అప్‌గ్రేడ్ చేశారు. డిస్‌ప్లే కూడా పూర్తిగా రీడిజైన్ చేసి, రేంజ్, ఛార్జింగ్ వివరాలు మరింత క్లియర్‌గా చూపేలా మార్చారు. రియల్ టైమ్ డేటా, రైడ్ స్టాటిస్టిక్స్, ఛార్జింగ్ స్టేటస్ వంటి సమాచారాన్ని చూపేలా యాప్ కనెక్టివిటీ కూడా మెరుగుపరిచారు. రైడింగ్ డైనమిక్స్‌ను వినియోగదారుల ఫీడ్‌బ్యాక్ ఆధారంగా రివైజ్ చేశారు. అంటే గత వెర్షన్‌తో పోలిస్తే ఇప్పుడు మరింత స్మూత్‌గా, కంట్రోల్‌లో ఉండేలా అనిపిస్తుంది.

బరువు విషయానికి వస్తే ఈ కొత్త వెర్షన్‌లో 7 కిలోలు తగ్గించారు. దీంతో కర్బ్ వెయిట్ 135 కిలోలకు తగ్గింది. అలాగే గ్రౌండ్ క్లియరెన్స్‌ను 168mm నుండి 177mmకి పెంచడంతో ఎత్తైన స్పీడ్ బ్రేకర్లపై స్కూటర్ తగలకుండా సౌకర్యంగా వెళ్లగలదు. ఇంకో చిన్న కానీ ఉపయోగకరమైన మార్పు రివర్స్ మోడ్‌లో కనిపిస్తుంది. గతంలో ఉన్న రెండు స్టెప్ ప్రాసెస్‌ను తీసేసి ఇప్పుడు ఒకే బటన్‌తో రివర్స్ చేసేలా సింపుల్ చేశారు.

కొత్త వెర్షన్‌లో కూడా కొనసాగుతున్న పాత ఫీచర్లు
మొదటిగా చెప్పుకోవాల్సింది దీని మోటార్ సెటప్. Gen 3 వెర్షన్‌లో మోటార్‌లో మార్పులు చేయలేదు. PMSM మోటార్‌ను కొనసాగిస్తున్నారు. ఇది 8.98 bhp శక్తిని, అలాగే 26 Nm టార్క్‌ను ఉత్పత్తి చేస్తుంది. ఈ మోటార్‌కు శక్తిని అందించే 4 kWh బ్యాటరీ అలాగే కొనసాగుతోంది. కంపెనీ ప్రకారం IDC రేంజ్ 163 కిలోమీటర్ల వరకు ఉండగా, వాస్తవ వినియోగంలో 80 నుంచి 100 కిలోమీటర్ల మధ్య రేంజ్ అందుతోంది.

రివర్ ఇండి జెన్ 3లో రైడింగ్ మోడ్‌లు కూడా యథావిధిగా మూడు ఉన్నాయి. అవి Eco, Ride, Rush మోడ్‌లు. వినియోగదారులు తమ అవసరానికి అనుగుణంగా పవర్ లేదా ఎఫిషియెన్సీని ఎంచుకునే అవకాశం ఇస్తాయి. సిటీ ట్రాఫిక్‌లో Eco మోడ్ ఉపయోగపడితే, మరింత పర్ఫార్మెన్స్ కావాలనుకునేవారికి Rush మోడ్ అనుభవాన్ని మెరుగుపరుస్తుంది. డిజైన్ విషయానికి వస్తే కూడా పెద్దగా మార్పులు చేయలేదు.

ముందు భాగంలో ఉన్న ప్రత్యేకమైన డ్యూయల్ హెడ్‌ల్యాంప్ సెటప్ అలాగే కొనసాగుతోంది. అంతేకాదు, ఇంటిగ్రేటెడ్ క్రాష్ గార్డ్స్, పొడవైన ఫుట్‌బోర్డ్, ఫ్రంట్ ఫుట్‌పెగ్స్ వంటి యుటిలిటీ-ఫోకస్డ్ అంశాలు కూడా అలాగే ఉన్నాయి. స్కూటర్ రెండు వైపులా ఉన్న సాడిల్ స్టేలు అవసరమైతే అదనపు లగేజ్‌ను మౌంట్ చేసుకునే అవకాశాన్ని ఇస్తాయి. వెనుక భాగంలో కూడా రిక్టాంగులర్ టెయిల్‌లైట్ డిజైన్ కొనసాగుతోంది, ఇది దీని ఐడెంటిటీగా మారిపోయింది.

సైజ్ పరంగా చూస్తే దీని పొడవు సుమారు 1,996 మిల్లీమీటర్లు ఉండటం వల్ల ఇది చాలా ప్రత్యర్థి స్కూటర్ల కంటే కనీసం 100 మిల్లీమీటర్లు పెద్దగా ఉంటుంది. ఈ అదనపు స్పేస్ కారణంగా ఉపయోగంలో చాలా ప్రయోజనం ఉంటుంది. ఫ్లాట్ ఫ్లోర్‌బోర్డ్ చాలా విశాలంగా ఉండటంతో పెద్ద వస్తువులను కూడా సులభంగా తీసుకెళ్లవచ్చు. ఫ్రంట్ ఫుట్‌పెగ్స్ వల్ల అవసరమైతే మొత్తం ఫ్లోర్‌ను పూర్తిగా ఉపయోగించుకునే అవకాశం ఉంటుంది.

ఇంకా పెద్ద అండర్‌సీట్ స్టోరేజ్ ఈ స్కూటర్‌లో కొనసాగుతోంది, ఇది సుమారు 43 లీటర్ల సామర్థ్యంతో ఉంటుంది. అదనంగా 12 లీటర్ల లాకబుల్ గ్లోవ్‌బాక్స్ అందుబాటులో ఉంది, ఇందులో ఛార్జింగ్ పోర్ట్ ఓపెన్ చేసే స్విచ్ కూడా ఉంటుంది. సీటింగ్ విషయానికి వస్తే, ఇది చాలా వెడల్పుగా, సౌకర్యవంతంగా ఉంటుంది. రైడర్, పిలియన్ ఇద్దరికీ మంచి కంఫర్ట్ ఇస్తుంది. అలాగే 787 మిల్లీమీటర్ల సీట్ హైట్ సులభంగా హ్యాండిల్ చేయగలరు.

డైలీ రైడింగ్ ఎక్స్‌పీరియన్స్ ఎలా ఉంది?
River Indie Gen 3పై రోజువారీ వినియోగ అనుభవం చూస్తే ఇది చాలా సాఫ్ట్‌గా, స్మూత్‌గా ముందుకు కదులుతుంది. స్టార్ట్ చేసిన వెంటనే ఎలాంటి జర్క్ లేకుండా కదలడం దీని ప్రత్యేకత. మోటార్ రిఫైన్మెంట్ బాగుండటంతో అన్ని స్పీడ్స్‌లోనూ శబ్దం చాలా తక్కువగా ఉంటుంది. మూడు రైడింగ్ మోడ్‌లు Eco, Ride, Rush ప్రతి ఒక్కటి వేరే అనుభవాన్ని ఇస్తాయి.

Eco మోడ్ తక్కువ స్పీడ్ కోసం, లేదా బ్యాటరీ సేవ్ చేయాలనుకునే సందర్భాల్లో బాగుంటుంది. కానీ సిటీ ట్రాఫిక్‌లో లేదా వేగంగా వెళ్లాల్సినప్పుడు కొంచెం నెమ్మదిగా అనిపిస్తుంది. రోజువారీ వినియోగానికి బెస్ట్ మోడ్ Ride. ఇందులో సుమారు 80 km/h వరకు స్పీడ్, 90 km వరకు రేంజ్ లభిస్తుంది. థ్రాటిల్ చాలా సాఫ్ట్‌గా ఉండటం వల్ల ట్రాఫిక్‌లో కంట్రోల్ చేయడం సులభం.

Rush మోడ్ పూర్తిగా స్పోర్టీ అనుభవం ఇస్తుంది. ఇందులో 90 km/h టాప్ స్పీడ్, కానీ రేంజ్ కొంచెం తగ్గి 70 km వరకు ఉంటుంది. థ్రాటిల్ రెస్పాన్స్ షార్ప్‌గా ఉండటంతో రైడింగ్ ఫన్‌గా అనిపిస్తుంది. సస్పెన్షన్ సెటప్ ఫ్రంట్ ఫోర్క్స్ కొంచెం గట్టిగా అనిపిస్తాయి, వెనుక షాక్స్ మాత్రం సాధారణ రోడ్లకు పనిచేస్తాయి. కానీ గుంతలు ఎక్కువగా ఉన్న రోడ్లపై వేగంగా వెళ్తే కొంచెం షాక్ ఫీల్ అవుతుంది.

135 కిలోల బరువు ఉన్నప్పటికీ చాలా అజైల్‌గా ఉంటుంది. ట్రాఫిక్‌లో సులభంగా మలుపులు తిరుగుతుంది, పెద్ద స్కూటర్ అన్న ఫీల్ ఇవ్వదు. కానీ 80 km/hకి పైగా వేగంలో కొంచెం స్టెబిలిటీ తగ్గినట్టు అనిపిస్తుంది. బ్రేకింగ్‌లో ముందు, వెనుక డిస్క్ బ్రేకులు ఉన్నాయి, CBS సపోర్ట్‌తో పనిచేస్తాయి. ఫ్రంట్ బ్రేక్ మంచి బైట్ ఇస్తుంది కానీ కొన్ని సందర్భాల్లో రియర్ బ్రేక్ వాడితే ముందు భాగం కొంచెం డైవ్ అవుతుంది.

రైడింగ్ పొజిషన్ విషయంలో కొంచెం ఇబ్బంది ఉంది. సీటు, ఫ్లోర్‌బోర్డ్ మధ్య స్పేస్ తక్కువగా ఉండటంతో కొంచెం కాళ్లు మడిచినట్లు అనిపిస్తుంది. కానీ ఫ్రంట్ ఫుట్‌పెగ్స్ వాడితే సరి అవుతుంది. చార్జింగ్ విషయానికి వస్తే 400W, 750W ఛార్జర్ ఆప్షన్లు ఉన్నాయి. 750W ఛార్జర్‌తో సుమారు 3 గంటల్లో 80% ఛార్జ్ అవుతుంది, పూర్తి ఛార్జ్‌కు సుమారు 4 గంటలు పడుతుంది. కానీ సాధారణ ఛార్జర్ కొంచెం స్లోగా అనిపిస్తుంది.

చివరగా
మొత్తం మీద చూస్తే River Indie Gen 3 ఒక ప్రాక్టికల్, యుటిలిటీ ఫోకస్‌డ్ ఎలక్ట్రిక్ స్కూటర్. ఎక్కువ స్టోరేజ్, మంచి రేంజ్, స్మూత్ రైడ్ దీని బలాలు. అయితే సర్వీస్ నెట్‌వర్క్ ఇంకా పెద్ద నగరాలకే పరిమితంగా ఉండటం, ఫాస్ట్ ఛార్జింగ్ ఇంకా మెరుగుపరచాల్సిన అవసరం ఉండటం దీని చిన్న లోపాలు.