Triumph Scrambler 400 XC Review: ఆఫ్-రోడ్ రైడింగ్‌కు బెస్ట్ బైక్.. ట్రయంఫ్ స్క్రాంబ్లర్ 400 XC కొనొచ్చా లేదా

Triumph Scrambler 400 XC Review: భారతదేశంలో మిడిల్ రేంజ్ మోటార్‌సైకిల్ సెగ్మెంట్లో ట్రయంఫ్ స్క్రాంబ్లర్ 400 XC ఒక కొత్త సెన్సేషన్. సుమారు రూ.2.95 లక్షల (ఎక్స్-షోరూమ్) ధరతో వచ్చిన ఈ బైక్, రెట్రో స్టైలింగ్, ఆఫ్-రోడ్ ఫీచర్లతో ఆకట్టుకుంటోంది. ఈ బైక్‌లో ట్యూబ్‌లెస్ స్పోక్డ్ వీల్స్, స్ప్లిట్ సీట్, ఇతర ఆఫ్-రోడ్ హార్డ్‌వేర్ ఉన్నాయి.

బజాజ్‎తో కలిసి డెవలప్ చేయబడిన ఈ బైక్ స్పీడ్ 400తో ఇంజిన్ ప్లాట్‌ఫారమ్‌ను షేర్ చేసుకుంటుంది. అయితే, దీనిలో ఆఫ్-రోడ్ రైడింగ్‌కు అనుకూలంగా ఉండేలా సస్పెన్షన్, వీల్స్‌లో కొన్ని స్పెషల్ మార్పులు చేశారు. ఈ మోడల్‌ను ట్రయంఫ్ రూపొందిస్తే బజాజ్ తయారు చేసింది. దీనిని ట్రయంఫ్ డీలర్‌షిప్‌లలో కొనుగోలు చేయవచ్చు, సర్వీస్ కూడా పొందవచ్చు. ఈ వార్తలో ట్రయంఫ్ స్క్రాంబ్లర్ 400 XC స్పెషాలిటీ ఏంటో తెలుసుకుందాం.

డిజైన్ : ఈ బైక్ చూడటానికి పాతకాలపు బైక్ లాగా ఉన్నా, ఇందులో చాలా కొత్త ఫీచర్స్ ఉన్నాయి. రౌండ్ హెడ్‌ల్యాంప్, విండ్‌స్క్రీన్, ఎత్తైన ఫెండర్, డ్యూయల్-టోన్ కలర్ ఇంధన ట్యాంక్ దీనికి మంచి లుక్ ఇస్తున్నాయి. ఇది ఎట్రాక్టివ్ డ్యూయల్-టోన్ పెయింట్ ఆప్షన్లతో వస్తుంది.

ఈ బైక్‌లో ట్యూబ్‌లెస్ వీల్స్ ఉండటం వల్ల పంచర్ అయితే రిపేర్ చేయడం చాలా సులభం. ముఖ్యంగా ఆఫ్-రోడ్ రైడింగ్ చేసేవారికి ఇది చాలా ఉపయోగపడుతుంది. ట్యూబ్‌లెస్ స్పోక్డ్ వీల్స్ రోడ్లపై మంచి గ్రిప్, ఆఫ్-రోడ్ ట్రిప్పులకు అనుకూలంగా ఉంటాయి.

గోల్డ్ కలర్లో ఉన్న అప్‌సైడ్-డౌన్ ఫ్రంట్ ఫోర్క్‌లు బైక్‌కు ప్రీమియం లుక్‌ను ఇస్తాయి. ఎల్‌ఈడీ హెడ్‌ల్యాంప్, టైల్ ల్యాంప్, ఇండికేటర్లు బైక్‌కు లేటెస్ట్ టచ్ అందిస్తాయి. స్ప్లిట్-సీట్ 835 మిమీ ఎత్తులో ఉంటుంది. ఇది పొట్టిగా ఉన్న వారికి కొంచెం కష్టం కావచ్చు. వెనుక భాగంలో గ్రాబ్ రైల్, టైల్ ల్యాంప్ అసెంబ్లీ ఉన్నాయి.

ఇంటీరియర్ ఫీచర్లు : ఇందులో సెమీ-డిజిటల్ ఇన్‌స్ట్రుమెంట్ క్లస్టర్ ఉంది. బైక్‌లో డిజిటల్ డిస్‌ప్లేతో కూడిన అనలాగ్ స్పీడోమీటర్ ఉంది. ఇది ట్రిప్, గేర్, ఇంధనం వంటి వివరాలను చూపిస్తుంది.

స్ప్లిట్ సీట్ మంచి కుషనింగ్‌ను ఇస్తుంది.. కానీ ఎక్కువ దూరం ప్రయాణించినప్పుడు కొంచెం గట్టిగా అనిపించవచ్చు. స్టాండర్డ్ గా విండ్‌స్క్రీన్, ఫేక్ గార్డ్‌లు, ఇంజిన్ బాష్ ప్లేట్ వంటివి ఉన్నాయి. విశాలమైన హ్యాండిల్‌బార్‌లతో నిటారుగా కూర్చునే యాంగిల్ రైడింగ్‌ను ఈజీ చేస్తుంది.

స్పెసిఫికేషన్స్, పర్ఫార్మెన్స్ : ఈ బైక్‌లో 398 సీసీ సింగిల్ లిక్విడ్-కూల్డ్ ఇంజిన్‌ను కలిగి ఉంది. ఇది 8,000 ఆర్‌పీఎం వద్ద 40 పీఎస్, 6,500 ఆర్‌పీఎం వద్ద 37.5 ఎన్ఎమ్ టార్క్‌ను ఉత్పత్తి చేస్తుంది. ఈ పవర్ సిటీలో, హైవేపై కూడా చాలా బాగా ఉపయోగపడుతుంది. స్మూత్ షిఫ్ట్‌ల కోసం ఇందులో స్లిప్-అండ్-అసిస్ట్ క్లచ్‌తో కూడిన ఆరు-స్పీడ్ గేర్‌బాక్స్ ఉంది.

బైక్‌లో 13-లీటర్ల ఇంధన ట్యాంక్ ఉంది. 19-అంగుళాల ముందు, 17-అంగుళాల వెనుక చక్రాలు, ఎంఆర్‌ఎఫ్ ట్యూబ్‌లెస్ టైర్‌లతో వస్తాయి. సస్పెన్షన్ విషయానికొస్తే, ముందు భాగంలో 43 మిమీ అప్‌సైడ్-డౌన్ ఫోర్క్‌లు, వెనుక ప్రీ-లోడ్ అడ్జస్టబుల్ మోనోషాక్ ఉన్నాయి.

డ్యూయల్-ఛానల్ ఏబీఎస్, ట్రాక్షన్ కంట్రోల్ వంటి సేఫ్టీ ఫీచర్లు ఉన్నాయి. కఠినమైన రహదారుల్లో మంచి కంట్రోల్ కోసం ఆఫ్-రోడ్ మోడ్‌లో ఈ ఫీచర్లను ఆపివేయవచ్చు.

చివరగా : ట్రయంఫ్ స్క్రాంబ్లర్ 400 XC అనేది స్టైలిష్, పవర్ ఫుల్ బైక్. ఆఫ్-రోడ్ కెపాసిటీ కలిగిన బైక్ ఇది. దీని శక్తివంతమైన ఇంజిన్, ఆఫ్-రోడ్ ఫీచర్లు, సేఫ్టీ టెక్నాలజీ కారణంగా ఇది రోజువారీ ఉపయోగం, వీకెండ్ సాహసాలకు చాలా మంచిది.

రెట్రో లుక్‌ని ఇష్టపడుతూ, అప్పుడప్పుడు ఆఫ్-రోడ్ రైడింగ్ కూడా చేయాలనుకునేవారికి ఈ బైక్ ఒక మంచి ఎంపిక. ఈ బైక్‌లో సీటు కొంచెం గట్టిగా ఉండడం లాంటి కొన్ని చిన్న సమస్యలు ఉన్నాయి, కానీ ఓవరాల్‌గా ఇది మంచి బైక్. మీరు బైక్ కొనాలనుకుంటే దీనిని ఒకసారి టెస్ట్ డ్రైవ్ చేసి చూడండి.