యానిమల్ లుక్.. లగ్జరీ ఫీచర్లు.. కొత్త జీఎస్టీ రూల్స్‌కు తగ్గట్టుగా 349cc ఇంజన్‌తో ట్రయంఫ్ నుంచి మరో బైక్

బ్రిటన్ లగ్జరీ బైక్ బ్రాండ్ ట్రయంఫ్ తన పాపులర్ టిఆర్-సిరీస్ (TR-Series) ప్లాట్‌ఫారమ్ ఆధారంగా గతేడాది అంతర్జాతీయ మార్కెట్లో ట్రాకర్ 400 బైక్‌ను పరిచయం చేసింది. ఫ్లాట్-ట్రాక్ రేసింగ్ మోటార్ సైకిళ్ల డిజైన్ స్ఫూర్తితో దీనిని రూపొందించారు. అయితే, భారతదేశంలో మారిన కొత్త జీఎస్టీ (GST) నిబంధనల కారణంగా 400cc అంతకంటే ఎక్కువ కెపాసిటీ ఉన్న బైక్‌లపై పన్నుల భారం పెరిగింది.దీంతో ఈ బైక్ ఇండియాకు రావడం కష్టమే అనుకున్న తరుణంలో, ట్రయంఫ్ కంపెనీ బజాజ్ ఆటోతో కలిసి కీలక మార్పు చేసింది. భారత మార్కెట్ కోసం ప్రత్యేకంగా 349cc ఇంజన్‌తో ఈ ఏడాది ఏప్రిల్ నెలలో దీనిని లాంచ్ చేశారు.

ఆకట్టుకునే రఫ్ అండ్ టఫ్ రేసింగ్ డిజైన్
ట్రయంఫ్ ట్రాకర్ 400 బైక్ లుక్ పరంగా తన మిగతా సిస్టర్ బైక్స్ (స్పీడ్ 400, స్క్రాంబ్లర్) కంటే పూర్తిగా భిన్నంగా, స్పోర్టీగా కనిపిస్తుంది. దీని బాక్సీ ఫ్యూయల్ ట్యాంక్, ఫ్లాట్‌గా పొడవుగా సాగే సీటు, టెయిల్ సెక్షన్ కలిసి దీనికి పక్కా రేసింగ్ స్టాన్స్‌ను ఇస్తాయి. బైక్ ముందు భాగంలో ఉండే ఫ్లైస్క్రీన్, పక్కల ఉండే నెంబర్-బోర్డ్ స్టైల్ ప్యానెల్స్ దీనికి రేసింగ్ థీమ్‌ను మరింత యాడ్ చేస్తాయి.

రౌండ్ ఎల్‌ఈడీ (LED) హెడ్‌ల్యాంప్, స్క్రాంబ్లర్ 400 ఎక్స్ నుంచి తీసుకున్న ఎగ్జాస్ట్ సైలెన్సర్ దీని రెట్రో లుక్‌ను పెంచుతాయి. అయితే, దీని రేర్ వ్యూ మిర్రర్స్ ప్లేస్‌మెంట్ కాస్త లోపభూయిష్టంగా ఉందని, వెనుక వచ్చే వాహనాలు స్పష్టంగా కనిపించాలంటే కాస్త వెడల్పాటి మిర్రర్స్ ఉంటే బాగుంటుందని నిపుణులు అభిప్రాయపడ్డారు.

సింపుల్ డిజిటల్ కన్సోల్ - బేసిక్ ఫీచర్లు
ఈ బైక్ వెనుక భాగం చూడటానికి ట్రయంఫ్ థ్రక్స్టన్ 400 (Thruxton 400) మోడల్‌ను పోలి ఉంటుంది. అందులోని లీనియర్ ఎల్‌ఈడీ టెయిల్ లైట్, సీటును ఇక్కడ కూడా ఉపయోగించారు. ఇక ఫీచర్ల విషయానికి వస్తే.. ఇందులో సెమీ-డిజిటల్ ఇన్‌స్ట్రుమెంట్ కన్సోల్ లభిస్తుంది.

ఇందులో స్పీడోమీటర్ కోసం అనలాగ్ డయల్ ఉండగా, డిజిటల్ స్క్రీన్‌లో ఓడోమీటర్, టాకోమీటర్, గేర్ పొజిషన్ ఇండికేటర్, ఫ్యూయల్ గేజ్, సైడ్-స్టాండ్ వార్నింగ్, ట్రిప్ మీటర్లు, టైమ్ డిస్‌ప్లే కనిపిస్తాయి. అయితే ఈ బైక్‌లో బ్లూటూత్ కనెక్టివిటీ లేదా రైడింగ్ మోడ్స్ లేవు. సేఫ్టీ కోసం నాన్-స్విచబుల్ డ్యూయల్-ఛానల్ ఏబీఎస్ (ABS), స్లిప్-అసిస్ట్ క్లచ్, స్విచబుల్ ట్రాక్షన్ కంట్రోల్ వంటి అవసరమైన ఫీచర్లను మాత్రమే అందించారు.

పవర్‌ఫుల్ 349cc ఇంజన్ పర్ఫామెన్స్
ఈ సరికొత్త ట్రయంఫ్ ట్రాకర్ 400 బైక్ గుండెకాయ లాంటి ఇంజన్ విషయానికి వస్తే.. ఇందులో 349cc సింగిల్-సిలిండర్ లిక్విడ్-కూల్డ్ మోటార్‌ను అమర్చారు. ఇది 40 హార్స్ పవర్ (hp), 32 న్యూటన్ మీటర్ల (Nm) టార్క్‌ను ప్రొడ్యూస్ చేస్తుంది. దీనిని 6-స్పీడ్ ట్రాన్స్‌మిషన్ గేర్‌బాక్స్‌తో జత చేశారు.

స్పీడ్ 400, స్క్రాంబ్లర్ 400 మోడళ్లు 37hp పవర్ ఇస్తే, ఈ కొత్త ట్రాకర్ బైక్ ఏకంగా 40hp పవర్‌ను జనరేట్ చేయడం విశేషం. భారతీయ పన్ను నిబంధనలకు అనుగుణంగా 398cc ఇంజన్ స్ట్రోక్‌ను తగ్గించి ఈ 349cc ఇంజన్‌ను తయారు చేశారు. దీనివల్ల అంతర్జాతీయ మోడల్ కంటే ఇది కేవలం 2hp పవర్ తక్కువగా ఉంటుంది. ఈ బైక్ బరువు 181 కేజీలు కాగా, సీటు ఎత్తు 805 మిమీగా ఉంది.

రైడింగ్ ఇంప్రెషన్స్ - రోడ్లపై దూసుకెళ్లే పవర్
ఈ బైక్ రైడింగ్ ఎక్స్‌పీరియన్స్ చాలా అద్భుతంగా ఉందని టెస్టర్లు చెబుతున్నారు. ముఖ్యంగా మిడ్-రేంజ్ వేగంలో దీని టార్క్ డెలివరీ చాలా పవర్‌ఫుల్‌గా ఉంటుంది. దీనివల్ల హైవేలపై ఓవర్‌టేక్ చేయడం చాలా ఈజీ అవుతుంది.

సిటీ ట్రాఫిక్‌లోనైనా, ఖాళీ హైవేలలోనైనా కారు ఆక్సిలరేషన్ చాలా ప్రిడిక్టబుల్గా, స్మూత్‌గా ఉంటుంది. ఇంజన్ ఎంత స్పీడ్‌లో ఉన్నా వైబ్రేషన్లు చాలా తక్కువగా ఉంటాయి. సిటీ ట్రాఫిక్‌లో క్లచ్ లివర్ నొక్కడం చాలా తేలికగా అనిపిస్తుంది. అయితే కంపెనీ దీనికి ఫ్యాక్టరీ ఫిట్టెడ్ క్విక్‌షిఫ్టర్ ఇచ్చి ఉంటే రైడింగ్ ఇంకా క్రేజీగా ఉండేదని నిపుణులు అభిప్రాయపడ్డారు.

కంఫర్ట్, హ్యాండ్లింగ్ సూపర్
రైడర్ కూర్చునే పొజిషన్ (Ergonomics) స్పోర్టీగా, లాంగ్ రైడ్స్‌కు కంఫర్ట్‌గా ఉండేలా డిజైన్ చేశారు. దీని వెడల్పాటి హ్యాండిల్‌బార్లు మలుపుల్లో బైక్‌ను ఈజీగా కంట్రోల్ చేయడానికి సహాయపడతాయి. ముందు భాగంలో ఉండే 43mm USD ఫోర్కులు, వెనుక ఉండే మోనోషాక్ సస్పెన్షన్లు భారతీయ రోడ్లపై ఉండే గుంతలను ఈజీగా తట్టుకుంటాయి.

దీని వీల్‌బేస్ తగ్గించడం, టైర్ల గ్రిప్ (MRF REVZ FD1 టైర్లు) అద్భుతంగా ఉండటం వల్ల స్పీడ్ 400 తో పోలిస్తే ఈ ట్రాకర్ 400 బైక్ చాలా చురుగ్గా కదులుతుంది. బ్రేకింగ్ విషయానికి వస్తే.. ముందు 300mm డిస్క్ బ్రేక్, వెనుక 230mm డిస్క్ బ్రేక్ విత్ ఏబీఎస్ ఉండటం వల్ల బైక్ ఎంత స్పీడ్‌లో ఉన్నా సడన్ బ్రేక్ వేసినా సురక్షితంగా ఆగిపోతుంది.