మారుతీ సుజుకి మరో 'ఫ్యామిలీ' కారు...'ఈకొ'..!!

Published: Monday, December 28, 2009, 11:04 [IST]

భారతీయ ప్రధాన ఆటోమొబైల్ కంపెనీ మారుతీ సుజుకీ త్వరలో ఓ సరికొత్త ఫ్యామిలీ కారుతో మన ముందుకు రావడానికి సన్నద్ధం అవుతోంది. 'ఈకొ' పేరుతో రూపొందుతున్న ఈ కారు 1,200 సిసి పెట్రోల్ ఇంజన్ తో, భారత్ స్టేజ్ IV నిబంధనలకు అనుగుణంగా రూపొందుతున్నట్టు సమాచారం. ప్రస్తుతం ఫ్యాక్టరీలో తుదిమెరుగులు దిద్దుకుంటున్న ఈ కారుని మారుతీ సుజుకీ ఇంజనీర్ల బృందం గత మూడు సంవత్సరాలుగా రూపొందిస్తున్నారు. ఈకొ కారు మూడు వరుసలు, రెండు వరుసల సీట్లతో రూపొందుతున్నట్టు తెలిసింది. మూడు వరుసల సీట్లతో రూపొందిన కారులో ఏడుమంది, రెండు వరుసల సీట్లతో రూపొందిన కారులో ఐదు మంది సౌకర్యవంతంగా కూర్చునే వీలుంది.

పారిశ్రామిక నిపుణుల అభిప్రాయం ప్రకారం ఈ కారు సి-సెగ్మెంట్ క్రిందకు వస్తుంది. దీని ధర నాలుగు లక్షలు, అంత కన్నా తక్కువగా వుండే అవకాశం వుంది. ఈ విషయమై మారుతి సుజుకి మేనేజింగ్ ఎగ్జిక్యూటివ్ అధికారి ఐవి రావు ను సంప్రదించగా గత మూడేళ్లుగా మా ఇంజనీర్లు భారతీయ వినియోగదారులకు ఓ మంచి కారును అందించేందుకు ఎంతో శ్రమిస్తున్నారు. వారి శ్రమ ఫలితమే ఈ కారు, ఇది ఖచ్చితంగా భారతీయ ప్రమాణికాలను పెంచేదిగా వుంటుందని ఆయన అభిప్రాయపడ్డారు. ఇది భారతదేశంలో చిన్న కార్ల రూపకల్పనకు మరింత చేయూతనిస్తుందని ఆయన ఆశాభావాన్ని వ్యక్తం చేసారు.

కాగా ఈ కారును వచ్చే నెలలో జరిగే ఢిల్లీ ఆటో షో లో ప్రదర్శనకు తీసుకురానున్నట్టు కూడా ఆయన చెప్పారు. ఈ ఆటో షో జనవరి 5 వ తేదీన ప్రారంభం కానుంది.