ఇండియాలో కొరొలా ఆల్టిస్ డీజిల్ వెర్షన్ విడుదల

Published: Thursday, July 22, 2010, 13:55 [IST]

న్యూఢిల్లీ: ప్రపంచంలో అతిపెద్ద కార్ల కంపెనీ అయిన టొయోటా తన ప్రీమియం సెడాన్ కొరొలా ఆల్టిస్‌లో డీజిల్ వెర్షన్‌ను భారత మార్కెట్లోకి విడుదల చేసింది. దీని ధర 10.95 -13.75 లక్షల రూపాయలు (ఎక్స్‌షోరూమ్, ఢిల్లీ). ఈ కారుకు 1.4 లీటర్ల 6స్పీడ్ మాన్యువల్ ట్రాన్స్‌మిషన్ ఇంజన్‌ను బిగించినట్లు టొయోటా కిర్లోస్కర్ మోటార్ మేనేజింగ్ డైరెక్టర్ హిరోషి నకాగవా తెలిపారు.

టొయోటా ఉత్తమ టెక్నాలజీని భారత్‌కు పరిచయం చేయడంలో భాగంగానే ఈ కారును మార్కెట్లోకి విడుదల చేసినట్లు ఆయన చెప్పారు. లీటర్ డీజిల్‌కు 21.43 కిలో మీటర్ల మైలేజీని కొరొలా ఆల్టిస్ ఇస్తుందని కంపెనీ చెబుతోంది. కాగా ఈ ఏడాది డిసెంబర్‌లో మార్కెట్లోకి విడుదల చేయనున్న ఎటియోస్ పట్ల కంపెనీ భారీ అంచనాలను వ్యక్తం చేస్తోంది.

వచ్చే సంవత్సరంలో కంపెనీ మొత్తం అమ్మకాలు 1,50,000 యూనిట్లకు చేరతాయని, ఇందులో 67,000 యూనిట్లు ఎటియోస్ కార్లే ఉంటాయని అంచనా వేస్తున్నట్లు టొయోటా కిర్లోస్కర్ డిప్యూటీ మేనేజింగ్ డైరెక్టర్ (మార్కెటింగ్) సందీప్ సింగ్ తెలిపారు. ఇక కొత్త సెడాన్ పెట్రోల్, సిఎన్‌జిలో కూడా అందుబాటులో ఉంది. ఎటియోస్‌లో మొదట పెట్రోల్ వెర్షన్‌ను తీసుకువస్తామని, డీజిల్ వెర్షన్‌ను తీసుకురావడానికి సంబంధించి మార్కెట్ అధ్యయనాన్ని చేపడుతున్నట్లు ఆయన చెప్పారు.

Article Published On: Thursday, July 22, 2010, 13:55 [IST]

More from DriveSpark