రీనాల్ట్ నుంచి సరికొత్త కాన్సెప్ట్ కార్ 'కాప్టర్'

ప్రముఖ ఆటోమొబైల్ సంస్థ రీనాల్ట్ మరో సరికొత్త కాన్సెప్ట్ కారు "కాప్టర్"ను పరిచయం చేసింది. అత్యంత ఆకర్షనీయమైన డిజైన్, అత్యాధునిక సాంకేతిక పరిజ్ఞానంతో రూపొందించిన ఇంజన్, తక్కువ మోతాదులో కార్బన్ డయాక్సైడ్‌ను విడదల చేయడం, అత్యత్తుమ ఇంటీరియర్స్, కళ్లు చెదిరే ఎక్స్టీరియర్లతో చూపరులను అయస్కాంతంలా ఆకర్షించుకోవడం ఈ కాప్టర్ స్పోర్ట్స్ కారు సొంతం. ఇద్దరికి మాత్రమే చోటు ఉండే ఈ కారును రీనాల్ట్-నిస్సాన్ సీఈఓ లాంఛనంగా విడుదల చేశారు. ఈ కారు తమ బ్రాండ్ ఇమేజ్‌ను మరింత పెంచుతుందని ఆయన ఆశాభావం వ్యక్తం చేశారు. ఈ కారు డిజైన్‌ను డిజిర్ కాన్సెప్ట్ ఆధారంగా రూపొందించామని, జూలియో లొజానో వంటి ప్రముఖులు దీని ఎక్స్టీరియర్లను రూపకల్పన చేశారని ఆయన వివరించారు.

సీతాకోక చిలుక రెక్కల్లా విచ్చుకునే డోర్లు, అవసరం లేదనుకున్నప్పుడు తొలగించుకోవడానికి వీలుగా ఉండే కన్వర్టబుల్ టాప్, విశాలమైన టైర్లు (బ్లాక్ అండ్ వైట్ రిమ్) దీని అదనపు ప్రత్యేకతలు. దీని సెంటర్ కన్సోల్, డాష్ బోర్డ్, డోర్ కేసింగ్‌ల డిజైన్‌లో అపారదర్శక పదార్థాలను డిజైనర్లు ఉపయోగించారు. ఇక దీని సాంకేతిక పరిజ్ఞానానికి వస్తే.. ఇది డిసిఐ 160 ట్విన్ టర్బో ఇంజన్‌తో పనిచేస్తుంది. అధిక ఇంధన సామర్థ్యం, డ్యూయెల్ క్లచ్ ఈడిసి గేర్‌బాక్స్, సెల్ఫ్ లాక్ వంటి అత్యాధునిక సదుపాయాలు కూడా ఈ కారులో ఉన్నాయి. అయితే ఈ కారు ధరను కానీ, మార్కెట్లో అధికార విడుదలకు సంబంధించిన వివరాలను కానీ.. కంపెనీ వెల్లడించలేదు.