కేవలం రూ. 2.69 లక్షలకే జిఎమ్ చిన్న కారు చెవర్లే స్పార్క్

గతంలో స్పార్క్ ప్రారంభ వేరియంట్ ధర రూ. 3.54 లక్షలుగా ఉండేది. కానీ మందగించిన విక్రయాలను మరియు పండగు సీజన్‌ను దృష్టిలో ఉంచుకొని కంపెనీ ఈ మోడల్లో ఎంట్రీలెవల్ వేరియంట్‌పై ఏకంగా రూ.85,000 తగ్గింపును ఆఫర్ చేస్తోంది. అది కూడా పరిమిత కాలం మాత్రమే. ఈ మేరకు జనరల్ మోటార్స్ టెలివిజన్‌లో వాణిజ్య ప్రకటనలు కూడా ఇచ్చి వినియోగదారులను ఆకర్షిస్తోంది.

గతంలో హోండా మోటార్స్ అందిస్తున్న ఫ్లాగ్‌షిప్ సెడాన్ సిటీపై ఏకంగా రూ.66,000 డిస్కౌంట్‌ను ప్రకటించి మార్కట్లో ఓ కొత్త ట్రెండ్‌కు శ్రీకారం చుట్టింది. ఆ వెంటనే తన ప్రీమియం హ్యాచ్‌బ్యాక్ కారు హోండా జాజ్‌పై సుమారు రూ.1,75,000 డిస్కౌంట్‌తో మరో సంచలనానికి తెరలేపింది. ఆ తర్వాత తక్కువ ధరకే (రూ. 5.5 లక్షలు) సరికొత్త హోండా జాజ్‌ను కూడా విడుదల చేసింది.

చెవర్లే స్పార్క్ సమీప పోటీదారు మోడల్ అయిన మారుతి సుజుకి ఆల్టో వేగానికి బ్రేక్ వేసేందుకు జనరల్ మోటార్స్ ఈ డిస్కౌంట్‌ను ప్రకటించినట్లు తెలుస్తోంది. ఇక చిన్న కారు స్పార్క్ విషయానికి వస్తే.. ఇంట్లో నలుగురు కుటుంబ సభ్యులు ఉండేవారికి ఇది చక్కగా సరిపోతుంది. విశాలమైన స్పేస్, అందమైన లుక్ మరియు శక్తివంతమైన ఇంజన్‌తో ఇది లీటరుకు 15-18 కి.మీ. మైలేజ్‌ను ఇస్తుంది.