స్విఫ్ట్ పోటీగా సెయిల్‌ను ప్రవేశపెట్టనున్న జనరల్ మోటార్స్

చైనాలో అభివృద్ధి చేసిన ఓ చిన్న కారును జనరల్ మోటార్స్ దేశీయ విపణిలో విడుదల చేసేందుకు సన్నాహాలు చేస్తుంది. "చెవర్లే సెయిల్" అనే పేరు కలిగిన ఈ చిన్న కారు ఇంచుమించు స్విఫ్ట్ పరిమాణంలోనే ఉండి, చెవర్లే బ్రాండ్‌లో అత్యధికంగా అమ్మడవుతున్న చిన్న కారు బీట్‌కు ఎగువన జనరల్ మోటార్స్ ప్రవేశపెట్టనుంది. ఈ మోడల్‌ను జనరల్ మోటార్స్‌కు చెందిన చైనా డివిజన్ రూపొందించింది. ఇప్పటికే చైనా మార్కెట్లో చెవర్లే సెయిల్ కార్లు హాట్ కేకుల్లా అమ్ముడవుతున్నాయి.

పరిశ్రమ వర్గాల సమాచారం ప్రకారం, చెవర్లే సెయిల్ హ్యాచ్‌బ్యాక్‌లో 1.2 లీటర్ పెట్రోల్ ఇంజన్‌ను గానీ లేదా మరింత శక్తివంతమైన 1.4 లీటర్ పెట్రోల్ ఇంజన్‌ను గానీ అమర్చే అవకాశం ఉన్నట్లు సమాచారం. అయితే, ప్రస్తుతానికి డీజిల్ ఇంజన్‌కు సంబంధించిన సమాచారం మాత్రం వెల్లడి కాలేదు. ప్రస్తుతం భారత మార్కెట్లో డీజిల్ కార్లకు డిమాండ్ పెరుగుతున్న నేపథ్యంలో, ఒకవేళ డీజిల్ వేరియంట్ సెయిల్ కారును ప్రవేశపెట్టాల్సి వస్తే, ఫియట్, జిఎమ్ సంయుక్తంగా అభివృద్ధి చేసిన 1.3 లీటర్ ఇంజన్‌ను ఉపయోగించే అవకాశం ఉంది.

ప్రస్తుతం భారత మార్కెట్లో చెవర్లే బ్రాండ్‌లో లభిస్తున్న ఏవియో అంతగా విజయం సాధించలేకపోయింది. ఈ నేపథ్యంలో ఏవియో స్థానాన్ని సెయిల్ స్థానంతో జిఎమ్ భర్తీ చేసే ఆస్కారం ఉంది. అలాగే, అప్‌గ్రేడెడ్ ఏవియో యూవీఏ మోడల్ అమ్మకాలు కూడా ఆశించినంతగా సాగడం లేదు. ఏవియో కన్నా సమర్థవంతమైన 5-స్పీడ్ మ్యాన్యువల్ ట్రాన్సిమిషన్ సిస్టమ్ సెయిల్‌లో ఉండనుంది. చెవర్లే సెయిల్ ధర మరియు ఇతర సాంకేతిక వివరాలు తెలియాల్సి ఉంది. మరిన్ని లేటెస్ట్ అప్‌డేట్స్ కోసం తెలుగు డ్రైవ్ స్పార్క్‌ను గమనిస్తూనే ఉండండి.