హాట్‌కేకుల్లా ఫిగో సేల్స్: అమ్మకాల్లో పదివేల మార్కును తాకిన ఫోర్డ్

బహుళ అవార్డులను సొంతం చేసుకున్న ఫోర్డ్ ఫిగో విక్రయాలు కూడా ఈ నెలలో భారీ వృద్ధిని కనబరచాయి. జనవరి 2011లో ఫిగో విక్రయాలు ఆల్-టైమ్ గరిష్టాన్ని తాకి 8,600 యూనిట్లుగా నమోదయ్యాయి. మార్చి 2010లో విడుదలైన ఫిగో ఒక్క నెలలో ఇంత అధిక సంఖ్యలో అమ్ముడుకావండ ఇదే తొలిసారి. రికార్డు స్థాయిలో నమోదైన ఈ విక్రయాలు ముందున్న కంపెనీ పురోభివృద్ధికి శుభసూచకాలని ఫోర్డ్ ఇండియా అధ్యక్షుడు మైఖేల్ బోన్‌హామ్ అన్నారు. 2010లో ఫోర్డ్ ఇండియా విక్రయాలు 83,887 యూనిట్లుగా ఉన్నాయి. కాగా వీటిలో ఒక్క ఫిగో విక్రయాలే 68,000 యూనిట్లకు పైగా ఉండటం విశేషం.

ఫిగో అవార్డుల పరంపర..:
ఫిగో 20 భారత ఆటో పరిశ్రమ అవార్డులను దక్కించుకొని బెస్ట్ కార్ ఆఫ్ ది ఇయర్‌గా నిలిచింది. భారత్‌లో అత్యధికంగా అమ్ముడయ్యే కార్లలో ఫిగో కూడా ఒకటి. భారత చరిత్రలోనే ఏ ఇతర కారుకు సాధించని విధంగా ఫిగో పలు ప్రతిష్టాత్మక అవార్డులను సొంతం చేసుకుందని బోన్‌హామ్ చెప్పారు.

ప్రముఖ ఆటోమోటివ్ మ్యాగజైన్ ఎడిటర్ల జ్యూరీ ప్యానల్‌ చేత ఫిగో "కార్ ఆఫ్ ది ఇయర్ 2011"గా ఎన్నికయింది. బ్లూంబర్గ్‌ యూటివి-ఆటోకార్ ఇండియా, ఈటి జిగ్‌వీల్స్, మోటార్‌బీమ్ డాట్ కామ్, టీమ్-బిహెచ్‌పి డాట్ కామ్‌ల నుంచి కూడా నాలుగు 'కార్ ఆఫ్ ది ఇయర్' అవార్డులను ఫిగో సొంతం చేసుకుంది. ఇంకా.. 'స్మాల్ కార్ ఆఫ్ ది ఇయర్', 'కాంపాక్ట్ కార్ ఆఫ్ ది ఇయర్', 'డిజైన్ ఆఫ్ ది ఇయర్', 'వీవర్స్ ఛాయిస్ మరియు రీడర్స్ ఛాయిస్ అవార్డ్‌'లతో పాటు బ్లూంబర్గ్‌ యూటివి-ఆటోకార్ ఇండియా, మోటార్ వికటాన్ మ్యాగజైన్‌ల నుంచి 'మ్యానుఫ్యాక్చరర్ ఆఫ్ ది ఇయర్' అవార్డులను కూడా ఫిగో దక్కించుకుంది.