పెట్రోల్ అయిపోయిందా.. అయినా కంగారు పడకండి.: మెక్‌కార్ ఉందిగా..!

Published: Saturday, May 28, 2011, 11:18 [IST]

టీవీ కొంటే డివిడి ప్లేయర్ ఫ్రీ... డివిడి ప్లేయర్ కొంటే కొత్త సినిమా సిడిలు ఫ్రీ... అంటూ రీటైల్ కంపెనీలు, తయారీదారులు కొత్త కొత్త కాంబో (జంట) ఆఫర్లతో వినియోగదారులను ఆకట్టుకోవడం మనం తరచూ గమనిస్తూనే ఉంటాం. అయితే మనం ఇప్పుడు చెప్పుకోబోయే కారు కూడా అలాంటిదే. ఇది కూడా ఓ కాంబో ఉత్పత్తి. కారు కొంటే స్కూటర్ ఫ్రీ..! అయితే ఇది సాదాసీదా కారో లేక స్కూటరో అనుకుంటే పొరపాటే. ఈ బైక్ కారుతో పాటు, అంటే కారులోనే అమరిపోయే విధంగా లభిస్తుంది. కారులో ప్రయాణించలేనని కొన్ని ఇరుకైన ప్రదేశాలు లేదా కార్లు వెళ్లలేని రోడ్లపై ఈ ఎలక్ట్రిక్ బైక్ ఎంచక్కా ఉపయోగపడుతుంది. కారు దిగిన తర్వాత నడవడం ఇష్టం లేనివాళ్లు లేదా దూర ప్రయాణాలు చేస్తున్నప్పుడు కారులో ఇంధనం అయిపోయినా లేదా టైర్ పంక్చర్ అయినా ఈ ఎలక్ట్రిక్ వాహనంపై వెళ్లి ఎంచక్కా మన పనులు పూర్తి చేసుకోవచ్చు.

చైనాకు చెందిన గీలే అనే ఆటోమొబైల్ సంస్థ పర్యావరణానికి హాని కలిగించని వాహనల అభివృద్ధి చేస్తుంది. ఇందులో భాగంగానే 'మెక్‌కార్' అనే ఈ కాంబో కార్ + స్కూటర్‌ను రూపొందించింది. గత నెల షాంగైలో జరిగిన ఆటో షోలో కంపెనీ ఈ కారును ప్రదర్శించింది. ఇది పూర్తిగా హైబ్రిడ్ వెర్షన్‌ (ఇంధనం + బ్యాటరీ పవర్)లో కానీ, లేదా పూర్తి ఎలక్ట్రిక్ వెర్షన్‌లో కానీ లభిస్తుంది. టూ-డోర్, ఫోర్ సీటర్ సామర్థ్యం కలిగిన ఈ కారు వెనుక భాగంలో మూడు చక్రాలుండే ఈ ఎలక్ట్రిక్ స్కూటర్‌ను మడతపెట్టి సర్దేసుకోవచ్చు. అవసరమైనప్పుడు బయటకు తీసుకొని వాడుకోవచ్చు. అంతేకాదండోయ్.. కారు రన్నింగ్‌‌లో ఉన్నప్పుడు ఎలక్ట్రిక్ మోటార్ ద్వారా ఉత్పత్తి అయ్యే విద్యుత్తుతో ఈ ఎలక్ట్రిక్ స్కూటర్‌ను చార్జ్ చేసుకోవచ్చు. బాగుంది కదా ఈ కాంబో కార్.. ఇంధన ధరలు మండుతున్న నేటి రోజుల్లో ఈ కార్లు మనదేశానికి కూడా వస్తే ఎంత బావుంటుందో..!

Article Published On: Saturday, May 28, 2011, 11:18 [IST]

English summary

China based auto company Geely displayed a Combo concept car 'McCar' in recently concluded Shanghai Auto Show. It's an ultra compact, two-door, four-seater hybrid car with a built-in, folding three wheeled electric scooter in the rear.

More from DriveSpark