వెర్నా, వెంటో సెడాన్‌లను ఓవర్‌టేక్ చేసిన హోండా సిటీ

మందగిస్తున్న హోండా సిటీ సెడాన్ అమ్మకాలకు ఊతమిచ్చేందుకు, ఈ కంపెనీ సదరు మోడల్‌పై ఏకంగా రూ. 66,000 డిస్కౌంట్‌ను ప్రకటించింది. దీంతో కొనుగోలుదారులు ఒక్కసారిగా హోండా సిటీ వైపు మొగ్గు చూపారు, ఫలితంగా సిటీ సెడాన్ కార్లు హాట్ కేకుల్లా అమ్ముడైయ్యాయి. ఈ సెగ్మెంట్లో కొత్తగా వచ్చిన కార్లను సైతం హోండా సిటీ ఓవర్‌టేక్ చేసింది.

ఆగస్టు 2011 నెలలో హోండా మొత్తం 5,819 యూనిట్ల సిటీ సెడాన్ కార్లను విక్రయించింది. అయితే, ఇదే సమయంలో సిటీ సెడాన్ సమీప పోటీదారులైన హ్యుందాయ్ ఫ్లూయిడిక్ వెర్నా (కొత్త మోడల్), మరియు ఫోక్స్‌వ్యాగన్ వెంటోలు వరుసగా 4,211 మరియు 3,019 యూనిట్లను విక్రయించి ఈ రేసులో వెనుకబడిపోయాయి. ఈ సెగ్మెంట్లో డీజిల్ ఇంజన్ పోర్ట్‌ఫోలియో లేకుండానే హోండా అనూహ్య రీతిలో తన యధాస్థానాన్ని దక్కించుకోవడం విశేషం.