భారత్‌లో రెండవ అత్యంత ఖరీదైన కారు 'కోయినిగ్‌సెగ్ అగెరా'

భారత మార్కెట్లో బుగాటి సూపర్ కార్ తర్వాత.. కోయినిగ్‌సెగ్ రెండవ అత్యంత ఖరీదైన కారు కావడం విశేషం. గతేడాది నవంబర్‌లో విడుదలైన బుగాటి స్పోర్ట్స్ కారు ధర రూ. 16.2 కోట్లు అయితే కోయినిగ్‌సెగ్ అగెరా సూపర్ కారు ధర రూ. 12.5 కోట్లు. అగెరా కారు 5 లీటర్ బై-టర్బో వీ8 ఇంజన్‌తో 1,115 హర్స్‌పవర్‌ను కలిగి ఉంటుంది.

ఈ మోడల్ కార్లు సంవత్సరం మొత్తం మీద 16-18 యూనిట్లు మాత్రమే తయారవుతాయంటేనే వీటికున్న క్రేజ్ ఏంటో ఇట్టే అర్థమవుతుంది. వీటిలో ఒకటి లేదా రెండు కార్లను మాత్రమే భారత మార్కెట్లో విక్రయిస్తామని కంపెనీ పేర్కొంది.

తమ కార్లను భారత్‌లోకి దిగుమతి చేసుకునేందుకు రాహుల్ భాటియా ప్రమోట్ చేసిన ఇంటర్‌గ్లోబ్ ఎంటర్‌ప్రైజెస్ సంస్థతో ఈ స్వీడన్ కంపెనీ టైఅప్ ఏర్పాటు చేసుకుంది. అయితే ఈ కార్లను విక్రయించడానికి ఎలాంటి డీలర్‌షిప్ కేంద్రాలను ఏర్పాటు చేయకుండా.. నేరుగా హై నెట్‌వర్క్ కలిగిన వ్యక్తులకు మాత్రమే విక్రయిస్తామని ఇంటర్‌గ్లోబ్ ఎస్టాబ్లిష్‌డ్ ప్రోడక్ట్స్ అధ్యక్షుడు, సీఈవో నిగెల్ ఏ హార్‌వుడ్ తెలిపారు.