జనవరిలో భారత రోడ్లపైకి రానున్న మారుతి ఎర్టిగా

Published: Saturday, October 15, 2011, 15:58 [IST]

ప్యాసింజర్ కార్ల తయారీలో తన సత్తా ఏంటో ప్రపంచానికి చాటి చెప్పిన భారతదేశపు అగ్రగామి కార్ల తయారీ సంస్థ మారుతి సుజుకి ఇండియా ఇప్పుడు ఎమ్‌యూవీ (మల్టీ యుటిలిటీ వాహన) విభాగంలో కూడా తానేంటో నిరూపించుకునేందుకు సిద్ధమయింది. టొయోటా ఇన్నోవాకు పోటీగా మారుతి సుజుకి అభివృద్ధి చేస్తున్న ఎమ్‌యూవీ 'ఎర్టిగా' రానున్న జనవరిలో మార్కెట్లోకి రానుంది.

తొలుత ఆర్-3 కాన్సెప్ట్ పేరుతో అభివృద్ధి చేసిన ఈ 7-సీటర్ ఎమ్‌యూవికు మారుతి సుజుకి ఇటీవలే 'ఎర్టిగా' అనే పేరును ఖరారు చేసింది. మారుతి సుజుకి నుండి అధిక వీల్ బేస్ కలిగిన ఓ పెద్ద వాహనాన్ని సొంతం చేసుకోవాలనుకునే వారి కల త్వరలోనే నిజం కానుంది. ఇప్పటికే మంచి బ్రాండ్ ఇమేజ్‌ను కలిగి ఉన్న మారుతి సుజుకి నుండి వస్తున్న ఇలాంటి ఓ ఎమ్‌యూవీకు తప్పకుండా మార్కెట్ నుండి మంచి ఆదరణ లభించగలదని విశ్లేషకులు భావిస్తున్నారు.

అత్యంత పోటీతత్వ ధరతో మారుతి సుజుకి ఈ ఎమ్‌యూవీని విడుదల చేసే అవకాశం ఉంది. దీని ధర రూ.6-9 లక్షల రేంజ్‌లో ఉండొచ్చని అంచనా. 4.2 మీటర్ల పొడవు ఉండనున్న ఈ ఎమ్‌పివి 2740 మి.మీ. వీల్ బేస్‌ను కలిగి ఉండనుంది. ఇందులో 1.3 లీటర్ వేరియబిల్ జియోమెట్రీ టర్బో డీజిల్ ఇంజన్‌ను ఉపయోగించినట్లుగా తెలుస్తుంది. ఇదే ఇంజన్‌ను ఎస్ఎక్స్4లో కూడా ఉపయోగిస్తున్నారు.