రెండేళ్లలో 17.5 లక్షల యూనిట్లను తాకనున్న మారుతి ఉత్పత్తి

Published: Saturday, July 23, 2011, 14:51 [IST]

భారతదేశపు నెంబర్ వన్ కార్ల తయారీ సంస్థ మారుతి సుజుకి ఇండియా లిమిటెడ్ (ఎమ్ఎస్ఐఎల్) వచ్చే రెండేళ్లలో తమ ఉత్పత్తి సామర్థ్యాన్ని 17.5 లక్షల యూనిట్లకు చేర్చాలని నిర్ణయించినట్లు కంపెనీ ఉన్నతాధికారి ఒకరు వెల్లడించారు. "రానున్న రెండేళ్లలో మూడో ప్లాంట్ (ప్లాంట్ సి) ప్రారంభం అయ్యాక మొత్తం ఉత్పత్తి సామర్థ్యం 14.5 లక్షల యూనిట్లకు చేరుతుంద"ని మారుతి సుజుకి మేనేజింగ్‌ ఎగ్జిక్యూటివ్‌ ఆఫీసర్ (ప్రొడక్షన్) ఎమ్ ఎమ్ సింగ్ తెలిపారు.

గుర్గావ్‌లోని మూడు ప్లాంట్ల మరియు మానేసర్‌‌లోని తొలి ప్లాంట్ (ప్లాంట్ ఏ)ల ద్వారా సాలీనా 13 లక్షల యూనిట్ల ఉత్పత్తిని చేస్తున్నామని ఆయన తెలిపారు. రానున్న నాలుగు, ఐదు నెలల్లో ఈ వార్షిక సామర్థ్యం 15.5 లక్షల యూనిట్లకు చేరగలదని ఆయన అంచనా వేశారు. ప్లాంట్ బి కోసం రూ. 1,700 కోట్లను పెట్టుబడులుగా వెచ్చించినట్లు ఆయన తెలిపారు.