అహ్మదాబాద్‌లో కాలి బూడిదైన మరో నానో కారు

Published: Thursday, March 3, 2011, 10:53 [IST]

టాటా మోటార్స్ బుజ్జి కారు నానో మరోసారి వార్తల్లోకెక్కింది. ఈసారి కూడా ఇంతకు ముందు లాగే నానో మంటల్లో భగ్గుమని వార్తల్లో ప్రధానంశంగా నిలిచింది. బుధవారం అహ్మదాబాద్‌లోని శివరంజని క్రాస్‌రోడ్స్‌కు సమీపంలో నానో కారు కాలి బూడిదైపోయింది. దీంతో ఇప్పటి వరకూ అగ్నికి ఆహుతి అయిన నానో కార్ల సంఖ్య ఎనిమిదికి పెరిగింది. విపుల్ జానీ అనే నానో యజమాని కారులో ఇంటికి వెళ్తుండగా ఈ సంఘటన చోటు చేసుకున్నట్లు తెలిసింది. ఉన్నట్టుండి తన కారులో హఠాత్తుగా మంటలు చెలరేగాయని జానీ విలేఖరులతో తెలిపారు. అనధికారిక ఎలక్ట్రికల్ ఫిట్‌మెంట్ వల్లే కారులో మంటలు చెలరేగడానికి కారణమై ఉండొచ్చునని టాటా మోటార్స్ పేర్కొంది. ఈ సంఘటనపై దర్యాప్తు చేస్తున్నామని కంపెనీ ప్రతినిధి ఒకరు వివరించారు.

గతేడాది మార్చిలో కారును డెలివరీ తీసుకున్న తరువాత ఓ వ్యక్తి దాన్ని తీసుకువెడుతుండగా, రోడ్డుపైనే నిప్పంటుకుని తగలబడిపోయిన సంగతి తెలిసిందే. ఆ తరువాత ఏప్రిల్‌లో కూడా ఇదే విధమైన సంఘటన జరిగింది. ఇంజన్‌కు ఇంధనాన్ని సరఫరా చేసే పైపులో లోపం కారణంగా మరో కారు అగ్నికి ఆహుతైంది. ఈ సంఘటనల తరువాత నానో ప్రాజెక్ట్‌ టీమ్‌, ఇంజనీరింగ్‌ రీసెర్చ్‌ సెంటర్‌ టీమ్‌, యూరప్‌ నుంచి వచ్చిన సాంకేతిక బృందం, జాగ్వార్‌ అండ్‌ లాండ్‌ రోవర్‌ రీసెర్చ్‌ టీమ్‌ కలసి నానోను పూర్తిగా పరిశీలించి ఇది పూర్తి సురక్షితంగా ఉన్నట్లు క్లీన్‌చిట్ ఇచ్చిన సంగతి తెలిసిందే. కాగా.. తాజాగా ఈ సంఘటన వెలుగు చూడటం గమనార్హం. దీంతో "నానో" అంటే "నో" అనే వారి సంఖ్య పెరిదే ఆస్కారం ఉందేమో..!? మరి దీనిపై టాటా ఎలాంటి వివరణ ఇస్తుందో వేచి చూడాల్సిందే.

Article Published On: Thursday, March 3, 2011, 10:53 [IST]

English summary

A recent incident involving Nano in fire near Shivanajni Crossroads has come to shock for both the customers and the company. The owner of the vehicle was driving home while the incident occurred and he told that he had made a police complaint regarding the incident.

More from DriveSpark