హోండా జాజ్‌ ఝలక్‌తో డైలమాలో పడిన కంపెనీలు

దీంతో దేశీయ మార్కెట్లో హోండా జాజ్ ప్రాబల్యం అంతంత మాత్రంగానే మిగిలిపోయింది. వీటన్నింటినీ పరిశీలించిన కంపెనీ, ఒక్కసారిగా హోండా జాజ్‌ (పాత వెర్షన్)పై రూ. 1.75 లక్షల వరకూ డిస్కౌంట్‌ను ప్రకటించిన సంగతి తెలిసిందే. అంతటితో ఆగకుండా.. ఈ మోడల్‌లోనే మరో కొత్త వేరియంట్‌ను అత్యంత పోటీ ధరతో కేవలం రూ. 5.5 లక్షలకే ఈ ప్రీమియం హ్యాచ్‌బ్యాక్‌ను ఆఫర్ చేస్తోంది.

హోండా అందిస్తోన్న ఈ బంపర్ ఆఫర్‌తో ఇదే విభాగంలో ఉన్న హ్యుందాయ్‌ ఐ20, ఫోక్స్‌‌వ్యాగన్‌ పోలో, మారుతి సుజుకి కొత్త స్విఫ్ట్‌, టొయోటా లివా, ఫోర్డ్‌ ఫిగో తయారీదారులు సమాలోచనలో పడ్డట్లయింది. అసలే మార్కెట్ మందగమనం కారణంగా తగ్గిన అమ్మకాలను ఎలా పెంచుకోవాలా అని కంపెనీలు తలపట్టుకుంటే.. ఈ పోటీతత్వ ధరలు వారికి మరో కొత్త తలనొప్పిగా మారుతున్నాయి.

ఈ మేరకు తమ ఉత్పత్తుల ధరలను ఏ కొంతైనా తగ్గించేందుకు గల సాధ్యాసాధ్యాలను అన్వేషిస్తున్నాయి. మరోవైపు పండుగ సీజన్‌లో సాదరణంగా అన్ని కంపెనీలు వివిధ ఆఫర్లను ప్రకటించడం సహజమే. అయితే, ఈసారి సదరు ఆఫర్లును మరింత జోరుగా అందించినట్లయితేనే కొనుగోలుదారులు కార్లను కొనేందుకు ఆసక్తి చూపుతారనడంలో అతిశయోక్తి లేదేమో.

ఏదేమైనప్పటికీ.. ఈసారి కార్ల కంపెనీలు అందించనున్న డిస్కౌంట్లు / ఆఫర్ల భారం తడిసి మోపెడు కానుంది. కొత్త కార్లను కొనుగోలు చేయాలనుకునే వారికి ఇదే సరైన సమయం. ఫైనాన్సు జోలికి వెళ్లకుండా పూర్తి మొత్తాన్ని చెల్లించి కార్లను కొనుగోలు చేసే వారు లబ్ధి పొండమే కాకుండా.. వడ్డీ రేట్ల బాదను కూడా తప్పించుకోవచ్చు.