బ్లూమోషన్ టెక్నాలజీ పస్సాట్ కారు రూ. 20.80 లక్షలు

విలాసవంతమైన కార్ల తయారీలో పేరుగాంచిన జర్మనీ ఆటోమొబైల్ దిగ్గజం వోక్స్‌వ్యాగన్.. గతంలో చెప్పిన విధంగా తమ సరికొత్త బ్లూమోషన్ టెక్నాలజీతో రూపొందించింన పస్సాట్ కారును దేశీయ మార్కెట్లోకి విడుదల చేసింది. ఆటోమేటిక్, మ్యాన్యువల్ ట్రాన్సిమిషన్ సిస్టమ్‌ ఆప్షన్లలతో కూడిన పస్సాట్ లగ్జరీ కారు డీజల్ వేరియంట్‌లో లభ్యమవుతుందని కంపెనీ వివరించింది. పస్సాట్ బుకింగ్‌లను ప్రారంభించామని, కొద్ది రోజుల్లోనే డెలివరీలను చేస్తామని, భారత మార్కెట్లో పస్సాట్ ప్రారంభ ధర రూ. 20.80 లక్షలు మొదలుకొని గరిష్ఠంగా రూ. 25.65 లక్షల వరకూ ఉంటుందని కంపెనీ తెలిపింది.

ఈ ఏడాది ఫిబ్రవరిలో అధునాతన 'బ్లూమోషన్' సాంకేతిక పరిజ్ఞానంతో తయారయిన కొత్త ఎడిషన్ "పస్సాట్" కారును ఈ ఏడాది మార్చిలో విడుదల చేయనున్నట్లు వోక్స్‌వ్యాగన్ ఇండియా గ్రూప్ సేల్స్ డైరెక్టర్ నీరజ్ గార్గ్ వెల్లడించిన సంగతి తెలిసిందే. బ్లూమోషన్ టెక్నాలజీలో ఉన్న స్టార్ట్ స్టాప్, బ్రేక్ ఎనర్జీ రెక్యుపరేషన్, డిఎస్‌జి డ్యూయెల్ క్లచ్ గేర్ బాక్స్, గేర్ షిఫ్ట్ ఇండికేటర్, అత్యంత ఇంధన సామర్థ్యం గల ఇంజన్ వంటి అధునాతన ఫీచర్లతో వోక్స్‌వ్యగాన్ పస్సాట్ కారు లభ్యమవుతుందని, ఆటోమొబైల్ పరిశ్రమలో తమ బ్లూమోషన్ టెక్నాలజీ ఓ కొత్త వరవడిని సృష్టించగలదని కంపెనీ ధీమా వ్యక్తం చేస్తుంది.