అసలు డ్రైవరే అవసరం లేని ఆటోమేటిక్ కారు

ఫ్రీ యూనివర్సిటీకి చెందిన పరిషోధకులు ప్రస్తుతం ఆ వాహనాన్ని జర్మన్ రాజధాని రోడ్లపై పరీక్షిస్తున్నారు. రద్దీలో ఎదురుగుండా ఉండే వాహనాలను గుర్తించేందుకు ముందువైపు ఓ కెమెరాను, కారు పైభాగంలోనూ మరియు ముందు బంపర్ చుట్టూ లేజర్ స్కానర్లను అమర్చారు.

ఇది శాటిలైట్ నేవిగేషన్ సిస్టమ్ (జిపిఎస్) ఆధారంగా పనిచేస్తుంది. వీటన్నింటినీ నియంత్రించేందుకు కారు లోపలి భాగంలో ఓ కంప్యూటర్‌ కూడా అమర్చబడి ఉంటుంది. రోడ్డుపై ఉండే ఇతర కార్లు, పాదచారులు, భవంతులు మరియు చెట్లు 70 మీటర్ల దూరంలో ఉండగానే ఇది గుర్తిస్తుందని, అంతేకాకుండా.. ట్రాఫిక్ లైట్లు రెడ్‌లో ఉన్నాయా లేదా గ్రీన్‌లో ఉన్నాయా అనే విషయాన్ని కూడా ఇది గుర్తించగలదని, యూనివర్సిటీ రీసెర్చ్ గ్రూప్ హెడ్ రౌల్ రోజస్ తెలిపారు.

వాతావరణంలోని మార్పులను మనుషుల కన్నా వేగంగా ఇది గుర్తించగలదని ఆయన చెప్పారు. పరిశోధకులు వారి పరిశోధన కోసం ఫోక్స్‌వ్యాగన్ పస్సాట్ కారును ఉపయోగించారు. నాలుగేళ్ల పాటు పరిశోధన చేసి ఈ వ్యవస్థను రూపొందించారు. అయితే, ఇప్పటికే ఇలాంటి టెక్నాలజీపై గూగుల్ పరిశోధనలు నిర్వహిస్తుండగా, నెవాడాలో టొయోటా కంపెనీ ఓ రోబోటిక్ ప్రియుస్ కారుతో పరిశోధనలు జరుపుతోంది. ఏదైతేనం ఈ వ్యవస్థ నిజంగా అందుబాటులోకి వస్తే.. డ్రైవర్ ఖర్చులు మిగలడం ఖాయం.