గ్రేట్‌ వాల్‌తో సంబంధాల కోసం జాగ్వార్ ల్యాండ్ రోవర్ చర్చలు

Published: Wednesday, February 23, 2011, 12:53 [IST]

భారత ఆటోమొబైల్ దిగ్గజం టాటా మోటార్స్‌కు చెందిన లగ్జరీ బ్రాండ్ "జాగ్వార్ ల్యాండ్ రోవర్" చైనాకు చెందిన స్పోర్ట్స్‌ యుటిలిటీ వాహన తయారీ సంస్థ "గ్రేట్‌ వాల్‌ మోటార్ కంపెనీ‌"తో ఓ ఒప్పందం కుదుర్చుకోవాలని భావిస్తోంది. ఈ మేరకు గల సాధ్యాసాధ్యాలను జాగ్వార్‌ అండ్‌ ల్యాండ్‌ రోవర్‌ యూనిట్‌ అధికారులు గ్రేట్ వాల్ అధికారులతో సంప్రదింపులు జరుపుతున్నట్లు సమాచారం.

రెండు కంపెనీలు సహకరించుకునేందుకు గల అవకాశాలను పరిశీలిస్తున్నాయని, జాగ్వార్‌ అండ్‌ ల్యాండ్‌ రోవర్‌ సీనియర్‌ ప్రతినిధులు ఈ నెల ఆరంభంలో తమ సంస్థను సందర్శించారని గ్రేట్ వాల్‌ మోటార్స్ ఎగ్జిక్యూటివ్‌ ఒకరు వెల్లడించారు. ఈ మేరకు ఇరుపక్షాల మధ్య సంబంధాలు ఇప్పటికే ప్రారంభ దశను దాటాయని, అయితే దీనిపై ఇంకా తుది నిర్ణయం తీసుకోలేదని ఈ చర్చలతో సంబంధం ఉన్న మరో ఉన్నతాధికారి వివరించారు. జాగ్వార్‌ ల్యాండ్‌ రోవర్‌ ఉన్నతాధికారులు చైనా పర్యటించినప్పుడు వారిని గ్రేట్‌ వాల్‌ చైర్మన్ వీ జియాంజున్‌ కలిశారని ఆయన తెలిపారు.