ధరల పెంపుకు సిద్ధమవుతున్న ఆటోమొబైల్ కంపెనీలు

Published: Monday, January 24, 2011, 14:05 [IST]

గతాడాది (2010)లో జోరుగా సాగిన వాహన విక్రయాలు 2011లో మందగించే అవకాశాలు మెండుగా కనబడుతున్నాయి. దీనికి ముఖ్య కారణం ధరలు విపరీతంగా పెరిగిపోవడమే. 2010లో వాహన విక్రయాలు భారీగా నమోదు కావడంతో జోరుమీదున్న కంపెనీలకు 2011 మాత్రం కాస్తంత గడ్డు కాలమనే చెప్పాలి. ముడి సరుకుల ధరలు నానాటికీ పెరిగిపోవడంతో ఇప్పటికే పలు వాహన తయారీదారులు తమ ఉత్పత్తులను ధరను పెంచే పనిలో పడ్డాయి. కాగా.. ఈ ధరల పెంపు ప్రభావం దేశీయ కార్ మార్కెట్‌పై తీవ్ర పరణామాలను చూపే ఆస్కారం ఉందని విశ్లేషకులు భావిస్తున్నారు.

దేశీయ ఆటోమొబైల్ దిగ్గజం మారుతి సుజుకి ఇప్పటికే ధరలను పెంచిన సంగతి తెలిసిందే. మారుతి తాజాగా విడుదల చేసిన అత్యధికంగా అమ్ముడయ్యే కారు (ది మోస్ట్ సెల్లింగ్ కార్) ఆల్టో కె10 మినహా మిగిలిన అన్ని మోడళ్లపై ధరలను 2.2 శాతం (రూ. 8,000 వరకూ) పెంచింది. మారుతి సుజుకి బాటలో హ్యుందాయ్ మోటార్ కంపెనీ తమ వాహనాల ధరలను పెంచాలని భావిస్తుంది. ప్రీమియం కార్లయిన వెర్నా, శాంత్రో, ఐ10, ఐ20 వంటి కార్ల ధరలను 1.5 శాతం మేర పెంచాలని హ్యుందాయ్ భావిస్తోంది.

ఇదేవిధంగా జనరల్ మోటార్ కంపెనీ కూడా కొన్ని రకాల మోడళ్లపై ధరలను 1-1.5 శాతం (రూ. 2,500 నుంచి రూ. 25,000) మేర పెంచాలని యోచిస్తున్నట్లు కంపెనీ వైస్‌ప్రెసిడెంట్ ప్రకటించారు. అలాగే టాటా మోటార్స్ సంస్థ అన్నిరకాల ప్యాసింజర్ వాహనాలపై ధరలను రూ. 1,500 నుంచి 15,000 మేర, వాణిజ్య వాహనాల (కమర్షియల్ వెహికల్స్)పై రూ. 3,000 నుంచి రూ. 30,000 మేర ధరలను పెంచిన సంగతి తెలిసిందే.

Article Published On: Monday, January 24, 2011, 14:05 [IST]

English summary

In contrast to the sale spirit in 2010, the car companies are put in a hardship with the dawn of the new year. Last year the car makers enjoyed a good share and earned enough profit margins. But the beginning of this year seems to write a sad note due to the price rise. They attribute their inability to contain the price on the rising input costs and raw materials. Maruti Suzuki’s level of price rise is about 2.2% as followed by GM and Hyundai Motor Company, who have effected the rise in December 2010.

More from DriveSpark