అప్‌గ్రేడెడ్ 2012 హోండా సిఆర్-వి ఫోటోలు విడుదల

అప్‌గ్రేడెడ్ హోండా సిఆర్‌-వి మోడల్‌ను మార్కెట్లోకి విడుదల చేసేందుకు కంపెనీ సన్నాహాలు చేస్తుంది. ఈ నేపథ్యంలో 2012 మోడల్ హోండా సిఆర్‌-వి ఫోటోలను హోండా తన అధికారిక వెబ్‌సైట్లో ఉంచింది. సరికొత్త 2012 హోండా సిఆర్‌-వి క్రాసోవర్‌ను పక్కన ఉన్న చిత్రంలో గమనించవచ్చు.

ఈ విభాగంలో టొయోటా ఫార్చ్యూనర్, టాటా ఆరియా వంటి లగ్జరీ కార్లకు గట్టి పోటీని ఇచ్చేందుకు కంపెనీ హోండా సిఆర్‌-విలో కొన్ని మార్పులు చేసి సరికొత్త లుక్‌తో విడుదల చేయనుంది. ప్రస్తుతం ఉన్న హోండా సిఆర్‌-వితో పోలిస్తే, 2012 హోండా సిఆర్‌-వి కాస్తంత పెద్దదిగా ఉండే అవకాశం ఉంది.

కొత్త హోండా సిఆర్-వి ఇంటీరియర్స్, ఎక్స్టీరియర్స్‌లలో అనేక మార్పులు చోటు చేసుకోనున్నాయి. ఈ చిత్రాన్ని బట్టి గమనిస్తే.. సౌకర్యవంతమైన ఇంటీరియర్ స్పేస్ కోసం వెనుక క్యాబిన్ పరిమాణాన్ని కొద్దిగా పెంచినట్లు తెలుస్తుంది. ఇంకా.. స్పోర్టీ లుక్ కోసం ఫ్రంట్ డిజైన్‌ను కూడా మార్చారు.

అలాగే, కొత్త హోండా సిఆర్-వి హెడ్ ల్యాంప్స్ కూడా చూడటానికి హోండా అకార్డ్ సెడాన్ కారు స్టైల్‌ను పోలి ఉంటాయి. దీన్ని ప్రస్తుతం అందుబాటులో ఉన్న హోండా సిఆర్-వి కన్నా అధిక మైలేజ్‌ను ఇచ్చేలా తీర్చదిద్దారు. జనవరిలో జరగనున్న ఢిల్లీ ఆటో ఎక్స్-పోలో కొత్త సిఆర్-వి దర్శనమిచ్చే అవకాశం ఉంది.