హ్యుందాయ్ డీజిల్ వెర్నా, ఐ20 వెయిటింగ్ పీరియడ్ తగ్గింపు

దేశీయ ద్వితీయ అగ్రగామి కార్ల తయారీ కంపెనీ హ్యుందాయ్ మోటార్ ఇండియా భారత మార్కెట్లో విక్రయిస్తున్న డీజిల్ వేరియంట్ వెర్నా సెడాన్, ఐ20 హ్యాచ్‌బ్యాక్‌ల వెయింట్ పీరియడ్ సగానికి పైగా తగ్గనుంది. ప్రస్తుతం దేశీయ మార్కెట్లో డీజిల్ కార్లకు డిమాండ్ జోరందుకుంటున్న సంగతి తెలిసిందే. ఈ నేపథ్యంలో ఈ రెండు మోడళ్ల డీజిల్ వేరియంట్ల ఉత్పత్తిని సగానికిపై పెంచనున్నామని కంపెనీ పేర్కొంది.

ఇది వరకూ ఈ రెండు మోడళ్లకు డీజిల్ ఇంజన్ల సరఫరా నెలకు 7,000 యూనిట్లుగా ఉన్నాయని, ప్రస్తుతం వీటిని 10,500 (50 శాతం పెంపు) యూనిట్లకు పెంచామని హ్యుందాయ్ మోటార్ ఇండియా లిమిటెడ్ డైరెక్టర్‌ (మార్కెటింగ్‌ అండ్‌ సేల్స్‌) అరవింద్‌ సక్సేనా తెలిపారు. వెర్నా, ఐ20 మోడళ్లకు కావల్సిన డీజిల్‌ ఇంజన్‌లను దక్షిణ కొరియా నుంచి దిగుమతి చేసుకుంటున్నామని ఆయన చెప్పారు.

Hyundai iGen i20

ఈ మోడళ్ల ఉత్పత్తిని పెంచడంతో వీటి వెయింటిగ్ పీరియడ్ గణనీయంగా తగ్గనుందని సక్సేనా తెలిపారు. ప్రస్తుతం డీజిల్‌ వెర్నా వెయిటింగ్‌ పీరయడ్ 6 నెలల నుంచి 2-3 నెలలకు తగ్గించనున్నామని, అలాగే కొత్త ఐజెన్‌ ఐ20 డీజిల్ మోడల్ వెయిటింగ్‌ పీరియడ్‌ను నెలకు తగ్గించనున్నామని ఆయన తెలిపారు. ఈ సౌకర్యం కోసం రూ.400 కోట్ల పెట్టుబడులు పెట్టామని సక్సేనా వివరించారు.