జులై 2012లో పెరిగిన మారుతి సుజుకి ఇండియా అమ్మకాలు

Updated: Wednesday, August 1, 2012, 16:57 [IST]

ఫ్యాక్టరీ లాకౌట్‌తో సతమతవుతున్న దేశపు అగ్రగామి కార్ కంపెనీ మారుతి సుజుకి ఇండియా (ఎమ్ఎస్ఐ)కు జులై నెలలో ప్రోత్సాహకర అమ్మకాలను నమోదు చేసుకుంది. జులై 2012 నెలలో కంపెనీ అమ్మాకాలు 9.2 శాతం వృద్ధిని సాధించి 82,234 యూనిట్లుగా నమోదయ్యాయి. గడచిన సంవత్సరం ఇదే సమయానికి కంపెనీ అమ్మకాలు 75,300 యూనిట్లుగా ఉన్నట్లు మారుతి సుజుకి ఇండియా ఓ ప్రకటనలో పేర్కొంది.

గడచిన నెలలో మొత్తం దేశీయ అమ్మకాలు 6.8 శాతం వృద్ధి చెంది 66,504 యూనిట్ల నుంచి 71,024 యూనిట్లకు పెరిగాయి. మారుతి సుజుకి తాజాగా ప్రవేశపెట్టిన కాంపాక్ట్ సెడాన్ స్విఫ్ట్ డిజైర్ కారణంగా అమ్మకాలు గణనీయంగా పెరిగాయి. జులై 2012 మొత్తం అమ్మకాల్లో 11,413 యూనిట్లు స్విఫ్ట్ డిజైర్ సెడాన్లే ఉన్నాయి. అయితే, ఎమ్800, ఆల్టో, ఏ-స్టార్, వ్యాగన్ఆర్ వంటి చిన్న కార్ల అమ్మకాలు 23.7 శాతం క్షీణించి 28,998 యూనిట్లుగా నమోదయ్యాయి.

స్విఫ్ట్ హ్యాచ్‌బ్యాక్, ఎస్టిలో, రిట్జ్ కార్ల అమ్మకాలు 73.2 శాతం వృద్ధిని సాధించి 15,759 యూనిట్లుగా నమోదయ్యాయి. మిడ్-సైజ్ సెడాన్ మారుతి సుజుకి ఎస్ఎక్స్4 అమ్మకాలు 70.5 శాతం వృద్ధి చెంది 679 యూనిట్లుగా నమోదు కాగా, కంపెనీ అందిస్తున్న లగ్జరీ సెడాన్ కిజాషి కేవలం రెండు కార్లు మాత్రమే అమ్ముడుపోయాయి. ఇదే సమయంలో కంపెనీ ఎగుమతులు 27.4 శాతం వృద్ధి చెంది 8,796 యూనిట్ల నుంచి 11,210 యూనిట్లకు పెరిగాయి. కాగా.. జులై 21 నుంచి మానేసర్ ప్లాంట్ లాకౌట్‌లో ఉంది. ఈ నేపథ్యంలో ఆగస్టు నెల అమ్మకాలు రికార్డు స్థాయిలో క్షీణించే అవకాశాలు కనిపిస్తున్నాయి.

Article Published On: Wednesday, August 1, 2012, 16:55 [IST]

English summary

India's largest carmaker Maruti Suzuki India has reported 9.2 per cent increase in sales for July at 82,234 units as against 75,300 units in the same month last year.

More from DriveSpark