కారులో పసిపాపలు ఉన్నప్పుడు జాగ్రత్త..! లేకపోతే..

మారుతి తన రెండేళ్ల బాబు (ఇళమారన్)ను కారులో ఉంచి, ఏసి రన్నింగ్‌లో పెట్టేసి లాక్ చేసుకుని మీటింగ్‌కు వెళ్లాడు. పది నిమిషాల్లో తిరిగి వచ్చేయన్న మారుతికి మీటింగ్ ముగిసి బయటకు వచ్చేసరికి దాదాపు గంటకు పైగా సమయం పట్టింది. ఈ లోపుగా కారులో ఉన్న రెండేళ్ల బాలుడు ఏసి చల్లనదం ఎక్కువై స్పృహ తప్పి పోయాడు.

మీటింగ్ అనంతరం కారు దగ్గరకు వచ్చి, లోపల ఉన్న ఇళమారన్‌ను చూసిన మారుతి వెంటనే, ఆ బాలుడిని హాస్పత్రికి తీసుకు వెళ్లగా, అప్పటికే ఆ బాబు మరణించినట్లు వైద్యులు ధృవపరిచారు. దీనికి కారణం కేవలం అతని అజాగ్రత్త, అప్రమత్తతే. పసికందులు కారులో ఉన్నప్పుడు, కారు నడిపే వారి నుండి, అందులో ప్రయాణించే వారి వరకూ అందరూ చాలా మెళకువగా వ్యవహరించాల్సి ఉంటుంది.

చిన్న పిల్లల కోసం ప్రత్యేకంగా తయారు చేయబడిన సీట్ కవర్‌లు ఉంటాయి. వాటిని ఉపయోగించటం ద్వారా కారులో పిల్లలు సేఫ్‌గా ఉంటారు. మనం ఎంత జాగ్రత్తగా వాహనం నడుపుతున్నప్పటికీ, ఎదుటి వారి అజాగ్రత్త కారణంగా ప్రమాదాలు జరిగే అవకాశం ఉంది. అందుకే, పసిపిల్లలు ఉండే కారులో ఎప్పుడూ కూడా "Baby On Board" అనే హెచ్చరిక సందేశాన్ని మీ వాహనం వెనుక వైపు ప్రయాణిస్తున్న వారికి, ముందు వైపుగా వస్తున్న వారికి తెలిసేలా సైన్ బోర్డు ఉంచటం చాలా మంచిది.