టొయోటా నుంచి అతిపెద్ద రీకాల్: 74 లక్షల కార్లు వెనక్కి

More Images

ఈ కార్లలో ఉపయోగించిన పవర్ విండో స్విచ్ సరిగ్గా పనిచేయని కారణంగా విండోలు సరిగ్గా ఓపెన్/క్లోజ్ అవ్వని కారణంగా వీటిని కంపెనీ రీకాల్ చేయనుంది. ఈ మొత్తం రీకాల్‌లో 24.7 లక్షల వాహనాలను అమెరికాలో, 14 లక్షల వాహనాలను చైనాలో 13.9 లక్షల వాహనాలను యూరప్‌లో, 8700 వాహనాలను ఇండియాలో టొయోటా రీకాల్ చేయనుంది. 1996లో అమెరికన్ కార్ మేకర్ ఫోర్డ్ ఏకంగా 79 లక్షల వాహనాలను రీకాల్ చేసింది. ఆ తర్వాత ఆటోమొబైల్ పరిశ్రమలో ఇంత భారీ సంఖ్యలో రీకాల్ చేయటం ఇదే మొదటిసారి.

ఇండియాలో జులై 30, 2008 నుంచి డిసెంబర్ 31, 2008 మధ్య కాలంలో తయారైన టొయోటా కరోలా ఆల్టిస్, అలాగే సెప్టెంబర్ 1, 2006 నుంచి జులై 31, 2008 మధ్య కాలంలో తయారైన టొయోటా క్యామ్రీ కార్లలో ఈ సమస్య ఉన్నట్లు సమాచారం. ఈ నేపథ్యంలో రీకాల్ క్రిందకు వర్తించే కార్లకు సంబంధించి సదరు కస్టమర్లకు టొయోటా వ్యక్తిగతంగా సమాచారం అందించి ఈ సమస్యను ఉచితంగా పరిష్కరించనుంది.

గత 2006-08 మధ్యకాలంలో ఉత్పత్తి అయిన వాహనాల్లో ఈ సమస్య ఉన్నట్లు టొయోటా గుర్తించింది. జపాన్‌లో 4,59,300 వాహనాలను, ఆస్ట్రేలియా మరియు ఆసియాల్లో 6,50,000 వాహనాలను, మిడిల్ ఈస్ట్‌లో 4,90,000 వాహనాలను, కెనెడాలో 2,40,000 వాహనాలను, ఇతర ప్రాంతాల్లో 330,000 వాహనాలను రీకాల్ చేసినట్లు టొయోటా ప్రతినిధి ఒకరు వెల్లడించారు. అయితే, ఈ సమస్య కారణంగా ప్రమాదాలు సంభవించినట్లు ఇంతవరకూ తమకు ఎలాంటి ఫిర్యాదులు అందలేదని కంపెనీ పేర్కొంది.