2015 హ్యుందాయ్ ఐ20 కూపే ఆవిష్కరణ; ఇండియాకు వస్తుందా?

ఈ 3-డోర్ వెర్షన్ 2015 ఐ20 మోడల్‌ను 'హ్యుందాయ్ ఐ20 కూపే' అని పిలవొచ్చని సమాచారం. ఈ మోడల్‌ను జర్మనీలోని రస్సెల్‌హీమ్ వద్ద ఉన్న హ్యుందాయ్ యూరోపియన్ డిజైన్ సెంటర్‌లో డిజైన్ చేశారు.

రెగ్యులర్ ఫైవ్-డోర్ వెర్షన్ ఐ20 మోడల్‌ని ఆధారంగా చేసుకొనే ఈ కొత్త త్రీ-డోర్ వెర్షన్ ఐ20ని డిజైన్ చేశారు. అయితే, త్రీ-డోర్ నిర్మాణం కోసం అన్ని పిల్లర్లను ఆల్టర్ చేశారు. ఫలితంగా దీని రూఫ్‌లైన్ ఫైవ్-డోర్ వెర్షన్ కన్నా దాదాపు 25 మి.మీ. తక్కువగా ఉంటుంది.

అయితే, ఈ మార్పు వలన త్రీ-డోర్ వెర్షన్ ఐ20లో ఎక్కువ బూట్ స్పేస్ లభిస్తుంది. ఫైవ్-డోర్ వెర్షన్ ఐ20తో పోల్చుకుంటే త్రీ-డోర్ వెర్షన్ ఐ20 బూట్ స్పేస్ 10 లీటర్లు ఎక్కువగా ఉంటుంది. దీని మొత్తం బూట్ స్పేస్ 336 లీటర్లు.

హ్యుందాయ్ ఐ20 కూపే (3-డోర్ వెర్షన్) రెండు పెట్రోల్, రెండు డీజిల్ ఇంజన్ ఆప్షన్లతో లభ్యం కానుంది. ఈ ఇంజన్లు యూరో-6 నిబంధనలను పాటించనున్నాయి.

పెట్రోల్ వెర్షన్‌లో 83 బిహెచ్‌పిల శక్తిని ఉత్పత్తి చేసే 1.25 లీటర్ ఇంజన్‌ను మరియు 99 బిహెచ్‌పిల శక్తిని ఉత్పత్తి చేసే 1.4 లీటర్, 3-సిలిండర్ పెట్రోల్ టర్బో ఇంజన్‌ను ఉపయోగించనున్నారు. ఇందులో 5-స్పీడ్ మ్యాన్యువల్, 6-స్పీడ్ మ్యాన్యువల్, 4-స్పీడ్ ఆటోమేటిక్ గేర్‌బాక్స్ ఆప్షన్స్ అందుబాటులో ఉంటాయి.

డీజిల్ వెర్షన్‌లో 74 బిహెచ్‌పిల శక్తిని ఉత్పత్తి చేసే 1.1 లీటర్ ఇంజన్‌ను మరియు 83 బిహెచ్‌పిల శక్తిని ఉత్పత్తి చేసే 1.4 లీటర్ ఇంజన్‌ను ఉపయోగించనున్నారు. ఇవి రెండూ కూడా 6-స్పీడ్ మ్యాన్యువల్ గేర్‌బాక్స్‌తో లభిస్తాయి.

ఈ కొత్త హ్యుందాయ్ ఐ20 కూపే మోడల్‌ను టర్కీలో ఉత్పత్తి చేయనున్నట్లు సమాచారం. మరి హ్యుందాయ్ మోటార్ ఇండియా ఈ మోడల్‌ను భారత మార్కెట్లో విడుదల చేస్తుందంటారా?