మహీంద్రా ఎక్స్‌యూవీ300 బిఎస్-6 వచ్చేసింది.. మారుతి బ్రిజా, టాటా నెక్సాన్‌లకు గట్టి షాక్!!

మహీంద్రా ఎక్స్‌యూవీ300 కాంపాక్ట్ ఎస్‌యూవీలోని పెట్రోల్ ఇంజన్‌ను మాత్రమే బిఎస్-6 ఉద్గార ప్రమాణాలకు అనుగుణంగా అప్‌గ్రేడ్ చేశారు. డీజల్ వెర్షన్ ఎక్స్‌యూవీ300 యధావిధిగా బిఎస్-4 ప్రమాణాలతోనే లభిస్తోంది.

మహీంద్రా దశల వారీగా తమ అన్ని మోడళ్లలో బిఎస్-6 ప్రమాణాలను పాటించే ఇంజన్‌ను అప్‌గ్రేడ్ చేయనుంది. ఏప్రిల్ 2020 గడువులోగా పెట్రోల్ మరియు డీజల్ అన్ని ఇంజన్‌లు బిఎస్-6 వెర్షన‌లో ఉంటేనే రిజిస్ట్రేషన్‌ చేయడానికి ఆర్టీఏ అధికారులు అనుమతిస్తారు.

బిఎస్-6 మహీంద్రా ఎక్స్‌యూవీ300 కాంపాక్ట్ ఎస్‌యూవీలో అదే 1.2-లీటర్ టుర్భో-పెట్రోల్ ఇంజన్ కలదు. 6-స్పీడ్ మ్యాన్యువల్ గేర్‌బాక్స్ అనుసంధానం గల ఇంజన్ 110బిహెచ్‌పి పవర్ మరియు 250ఎన్ఎమ్ టార్క్ ఉత్పత్తి చేస్తుంది. బిఎస్-4 ఇంజన్‌తో పోల్చుకుంటే బిఎస్-6 వెర్షన్ ఇచ్చే పవర్‌ అవుట్‌పుట్‌లో ఎలాంటి మార్పులేదు.

మహీంద్రా ఎక్స్‌యూవీ300 డీజల్ వెర్షన్‌లో 115బిహెచ్‌పి పవర్ మరియు 350ఎన్ఎమ్ టార్క్ ప్రొడ్యూస్ చేసే 1.5-లీటర్ డీజల్ ఇంజన్ కలదు. ప్రస్తుతం బిఎస్-4 వెర్షన్‌లోనే లభిస్తోంది, త్వరలో దీనిని కూడా బిఎస్-6 ప్రమాణాలతో అప్‌గ్రేడ్ చేయనున్నారు. దీనిని 6-స్పీడ్ మ్యాన్యువల్ లేదా ఆటోమేటిక్ గేర్‌బాక్స్ ఆప్షన్‌తో ఎంచుకోవచ్చు.

మహీంద్రా ఎక్స్‌యూవీ300 కాంపాక్ట్ ఎస్‌యూవీని తొలుత ఫిబ్రవరి 2019లో లాంచ్ చేశారు, విడుదలైన తొలి రెండు మూడు నెలల్లో భారీ సక్సెస్ సాధించింది. ఆ వెంటనే వచ్చిన హ్యుందాయ్ వెన్యూ గట్టి పోటీనిచ్చింది. అయితే, కంపెనీ తాజాగా ప్రవేశపెట్టిన బిఎస్-6 వెర్షన్ మహీంద్రా ఎక్స్‌యూవీ300 సేల్స్ పుంజుకునేందుకు సహాయపడనుంది.

మహీంద్రా ప్రవేశపెట్టిన మొట్టమొదటి బిఎస్-6 మోడల్ ఎక్స్‌యూవీ300. ఏప్రిల్ 2020 లోపు అన్ని మోడళ్లలో దశల వారీగా బిఎస్-6 ఇంజన్‌ను అప్‌గ్రేడ్ చేయనున్నట్లు మహీంద్రా ప్రకటించింది. మహీంద్రా ఎక్స్‌యూవీ300 కాంపాక్ట్ ఎస్‌‌యూవీ మారుతి సుజుకి వితారా బ్రిజా, హ్యుందాయ్ వెన్యూ, ఫోర్డ్ ఇకోస్పోర్ట్ మరియు టాటా నెక్సాన్ మోడళ్లకు గట్టి పోటీనిస్తోంది.