బెర్లిన్ వ్యాపారవేత్తను వరించిన తొలి ఫోక్స్‌వ్యాగన్ ఎక్స్ఎల్1

తొలి ఫోక్స్‌వ్యాగన్ ఎక్స్ఎల్1 హైబ్రిడ్ కారును అందుకుంటున్న మెక్‌కిన్సే అండ్ కంపెనీ డైరెక్టర్ డా. క్రిస్టియన్ మలోర్నీ.

గత కొద్ది సంవత్సరాలుగా ఫోక్స్‌వ్యాగన్ తమ ఎక్ఎల్స్1 కాన్సెప్ట్‌పై పనిచేస్తోంది. తాజాగా.. గడచిన సంవత్సరం మార్చ్ నెలలో జెనీవాలో జరిగిన 83వ అంతర్జాతీయ మోటార్ షోలో ఇందులో ఉత్పత్తికి సిద్ధంగా ఉన్న ప్రొడక్షన్ వెర్షన్‌ను ప్రదర్శించింది.

ఫోక్స్‌వ్యాగన్ ఎక్స్ఎల్1 హైబ్రిడ్ కారు డీజిల్ ఇంజన్, ఎలక్ట్రిక్ మోటార్ సాయంతో నడుస్తుంది. ఇందులో 47 బిహెచ్‌పి, ట్విన్-సిలిండర్, 800 సీసీ, టర్బో డీజిల్ ఇంజన్‌ను, అలాగే, 27 బిహెచ్‌పి ఎలక్ట్రిక్ మోటార్‌లను అమర్చారు.

ఈ రెండు మోటార్లలో డీజిల్ ఇంజన్ రెగ్యులర్ డీజిల్‌తో నడుస్తుంది. ఇకపోతే ఎలక్ట్రిక్ మోటార్ మాత్రం కారులో అమర్చిన 5.5 కిలోవాట్ బ్యాటరీ సాయంతో నడుస్తుంది.

ఫోక్స్‌వ్యాగన్ ఎక్స్ఎల్1 హైబ్రిడ్ కారు బరువును తేలికంగా ఉంచేందుకు గానూ దీని బాడీ నిర్మాణంలో ఎక్కువ భాగం ధృఢమైన కార్బన్ ఫైబర్‌ను ఉపయోగించారు. ఫలితంగా ఈ కారు నుంచి అధిక మైలేజ్ రాబట్టడం సాధ్యమైంది.

ఫోక్స్‌వ్యాగన్ ఎక్స్ఎల్1 హైబ్రిడ్ కారు మొత్తం బరువు 795 కేజీలు మాత్రమే. ఈ కారులో ఇద్దరికి మాత్రమే చోటు ఉంటుంది. కంపెనీ పేర్కొన్న సమాచారం ప్రకారం, ఫోక్స్‌వ్యాగన్ ఎక్స్ఎల్1 హైబ్రిడ్ కారు లీటరు ఇంధనానికి 111.16 కిలోమీటర్ల మైలేజీనిస్తుంది.

ఫోక్స్‌వ్యాగన్ ఎక్స్ఎల్1 3.8 మీటర్ల పొడవును, 1.66 మీటర్ల వెడల్పును కలిగి ఉంటుంది. దీని గరిష్ట వేగం గంటకు 159.9 కిలోమీటర్లు. ఇది 12.7 సెకండ్ల వ్యవధిలో 0-100 కిలోమీటర్ల వేగాన్ని అందుకుంటుంది. దీని గరిష్ట వేగం గంటకు 160 కి.మీ.

ఫోక్స్‌వ్యాగన్ ఎక్స్ఎల్1 కారులో 10 లీటర్ల సామర్థ్యం కలిగిన ఇంధన ట్యాంక్ ఉంటుంది. ఈ ఇంధనం సాయంతో 49.8 కిలోమీటర్ల దూరం ప్రయాణించవచ్చు. డీజిల్, బ్యాటరీ పవర్‌తో కలిపి ఈ కారులో 499 కిలోమీటర్ల దూరం ప్రయాణించవచ్చని కంపెనీ చెబుతోంది.

దీని ధరను కంపెనీ అధికారికంగా వెల్లడించకపోయినప్పటికీ, ఇది లక్ష డాలర్లు ఉండొచ్చని అంచనా. అంటే మన దేశ కరెన్సీలో సుమారు రూ.54 లక్షలకు పైమాటే (పన్నులు కలుపుకోకుండా).

ఇలాంటి కార్లు ఇండియాకి కూడా వస్తే ఎంత బాగుంటుందో కదా..!