మేడ్ ఇన్ ఇండియా బిఎమ్‌‌డబ్ల్యూ 3 సిరీస్ జిటి విడుదల

భారత్‌లో బిఎమ్‌డబ్ల్యూ 3 సిరీస్ జిటి రెండు వేరియంట్లలో మాత్రమే లభ్యం కానుంది. ఇందులో 2.0 లీటర్ ట్విన్ టర్బో, ఫోర్ సిలిండర్ కామన్ రైల్ డైరెక్ట్ ఇంజెక్షన్ డీజిల్ ఇంజన్‌ను ఉపయోగించారు. ఇది 7.9 సెకండ్ల వ్యవధిలో 0-100 కి.మీ. వేగాన్ని అందుకుంటుంది. దీని గరిష్ట వేగం గంటకు 226 కి.మీ.

బిఎమ్‌డబ్ల్యూ 3 సిరీస్ జిటి దాని సెడాన్ వెర్షన్ కన్నా పొడవుగా, వెడల్పుగా ఉంటుంది. సెడాన్ వెర్షన్‌తో పోల్చుకుంటే ఇది 200 మి.మీ. పొడవును, 50 మి.మీ. ఎత్తును, 17 మి.మీ. వెడల్పును కలిగి ఉంటుంది. అంటే ఇది బిఎమ్‌డబ్ల్యూ ఎక్స్1 కాంపాక్ట్ ఎస్‌యూవీ కన్నా విశాలంగా ఉంటుందన్నమాట.

బిఎమ్‌డబ్ల్యూ 3 సిరీస్ జిటి బూట్ డోర్ స్కొడా ర్యాపిడ్ స్పేస్‌బ్యాక్ మాదిరిగా ఓపెన్ అవుతుంది. అంటే, ఇందులోని వెనుక అద్దం కూడా బూట్ డోరుకే అమర్చబడి ఉంటుంది. ఇందులో స్పెషాలిటీ ఏంటంటే, వెనుక బంపర్ క్రింద కాలును గాలిలో ఊపితే చాలు బూట్ డోర్ తెరచుకుంటుంది.

బ్రాడ్ రియర్ ఎండ్ కలిగిన జిటి వెర్షన్ కొంచెం బోల్డ్‌గా కనిపిస్తుంది, సెడాన్‌ను ఉపయోగించేవారు దీనికి అలవాటు పడాల్సి ఉంటుంది. 3 సిరీస్ జిటి సెడాన్‌తో పోల్చుకుంటే మంచి కంఫర్ట్ రైడ్‌ను అందిస్తుంది.

ఇక ఇంటీరియర్ ఎక్విప్‌మెంట్స్ విషయానికి వస్తే, 3 సిరీస్ సెడాన్లో లభ్యమవుతున్న అన్ని రకాలు ఫీచర్లు కూడా ఇందులో లభ్యం కానున్నాయి.