బిఎమ్‌డబ్ల్యూ 6 సిరీస్ గ్రాన్ కూపే బర్లెస్క్యూ స్టైల్ ఫొటోలు

By Ravi

Published: Tuesday, April 23, 2013, 9:57 [IST]

జర్మన్ లగ్జరీ కార్ కంపెనీ బిఎమ్‌డబ్ల్యూ, లాస్ ఏంజిల్స్ పారామౌంట్ పిక్చర్స్ స్టూడియోస్ వద్ద జరగనున్న ప్యారిస్ ఫొటో ఇనారగల్ ఫెయిర్‌లో పాల్గొనబోతుంది. ఈ నేపథ్యంలో తమ లగ్జరీ కారు 'బిఎమ్‌డబ్ల్యూ 6 సిరీస్ గ్రాన్ కూపే'తో కంపెనీ రూపొందించిన బర్లెస్క్యూ-స్టైల్ ఫొటోలను ఇందులో ప్రదర్శనకు ఉంచనుంది. ఈ ఫొటోలను జర్మన్ ఫొటోగ్రాఫర్ వుయ్ దట్‌మ్యాన్ తన కెమెరాల్లో బంధించాడు.

బిఎమ్‌డబ్ల్యూ 6 సిరీస్ గ్రాన్ కూపే కారు యొక్క మోడ్రన్ స్టైల్‌ను ప్రతిభింభింపజేసేలా ఈ ఫొటోలు ఉంటాయి. వాస్తవానికి ఈ ఫొటోలను దాదాపు రెండేళ్ల క్రితం లాస్ ఏంజిల్స్‌కు వెలుపల ఓ ప్రైవేట్ సినిమా కోసం వేసిన సెట్‌పై హాలీవుడ్ స్టూడియోస్ వద్ద తీసారు. ఆ ఫొటోలను ఇప్పుడు విడుదల చేశారు. మరి ఈ అందమైన ఫొటోలను మనం కూడా తిలకిద్దాం రండి..!

బిఎమ్‌డబ్ల్యూ 6 సిరీస్ గ్రాన్ కూపే విషయానికి వస్తే, కంపెనీ గడచిన సంవత్సరం చివర్లో ఈ కారును భారత విపణిలో విడుదల చేసింది. దేశీయ మార్కెట్లో ఇది కేవలం ఒక్క వేరియంట్‌లో (640డి) మాత్రమే లభిస్తుంది. ఇందులో 3.0 లీటర్, 6-సిలిండర్, 4-వాల్వ్ డీజిల్ ఇంజన్‌ను ఉపయోగించారు. ఇది గరిష్టంగా 313 బిహెచ్‌పిల శక్తిని, 630 ఎన్ఎమ్‌ల టార్క్‌ను ఉత్పత్తి చేస్తుంది. ఈ ఇంజన్ 8-స్పీడ్ ఆటోమేటిక్ ట్రాన్సిమిషన్‌తో జతచేయబడి ఉంటుంది. బిఎమ్‌డబ్ల్యూ 6 సిరీస్ గ్రాన్ కూపే గరిష్టం వేగం గంటకు 250 కిలోమీటర్లు. ఇది కేవలం 4.5 సెకండ్లలోనే 0-100 కిలోమీటర్ల వేగాన్ని అందుకుంటుంది. దేశీయ విపణిలో దీని ధర రూ.86.40 లక్షలు (ఎక్స్-షోరూమ్)గా ఉంది.