షెవర్లే సెయిల్ లిమిటెడ్ ఎడిషన్ విడుదల; వివరాలు

అమెరికన్ ఆటోమొబైల్ దిగ్గజం జనరల్ మోటార్స్ ఎన్నో ఆశలు పెట్టుకొని తమ షెవర్లే సెయిల్ కారును భారత మార్కెట్లో విడుదల చేసింది. అయితే, ఇది కంపెనీకి ఆశించిన ఫలితాలను తెచ్చిపెట్టడంలో విఫలమైంది. ఈ నేపథ్యంలో, షెవర్లే సెయిల్ అమ్మకాలు కాస్తంత ఊతమిచ్చేందుకు జనరల్ మోటార్స్ ఇందులో ఓ లిమిటెడ్ ఎడిషన్‌ను విడుదల చేసింది.

రెగ్యులర్ షెవర్లే సెయిల్‌తో పోల్చుకుంటే ఈ షెవర్లే సెయిల్ లిమిటెడ్ ఎడిషన్‌లో కంపెనీ మరిన్ని అదనపు ఫీచర్లను ఆఫర్ చేస్తోంది. దేశీయ విపణిలో ఈ లిమిటెడ్ ఎడిషన్ షెవర్లే సెయిల్ సెడాన్ ప్రారంభ దర రూ.5.36 లక్షలు (ఎక్స్-షోరూమ్)గా ఉంది. ఈ లిమిటెడ్ ఎడిషన్‌లో అదనపు ఫీచర్లు మినహా డిజైన్ పరంగా కానీ లేదా యాంత్రికపరంగా కానీ ఎలాంటి మార్పులు లేవు.

ఈ అదనపు ఎక్విప్‌మెంట్లు, యాక్ససరీల విలువ రూ.45,000 వరకు ఉంటుందని షెవర్లే పేర్కొంది. షెవర్లే సెయిల్ పెట్రోల్ ఇంజన్ (1.2 లీటర్) మరియు డీజిల్ ఇంజన్ (1.3 లీటర్) ఆప్షన్లతో లభిస్తుంది. పెట్రోల్ వెర్షన్ లీటరుకు 18.2 కిలోమీటర్ల మైలేజీని, డీజిల్ వెర్షన్ లీటరుకు 22.1 కిలోమీటర్ల మైలేజీనిస్తుందని కంపెనీ పేర్కొంది.