చెన్నై రోడ్లపై డాట్సన్ గో ప్లస్ ఎమ్‌పివి టెస్టింగ్..

డాట్సన్ గో హ్యాచ్‌బ్యాక్, నిస్సాన్ మైక్రా కార్లలో ఉపయోగిస్తున్న అదే 1.2 లీటర్ పెట్రోల్ ఇంజన్‌నే డాట్సన్ గో ప్లస్ ఎమ్‌పివిలోను ఉపయోగించనున్నారు. ఈ ఇంజన్ 5-స్పీడ్ మ్యన్యువల్ గేర్‌బాక్స్‌తో జతచేయబడి ఉంటుంది. ఇందులో డీజిల్ వెర్షన్ కూడా అందుబాటులో ఉండనుంది. నిస్సాన్ మైక్రాలో ఉపయోగిస్తున్న డీజిల్ ఇంజన్‌నే ఇందులోను ఉపయోగించే ఆస్కారం ఉంది.

డాట్సన్ గో ప్లస్ ఎమ్‌పివి 7 సీటర్ ఆప్షన్ (2+3+2) (డ్రైవర్‌తో కలిపి)ను కలిగి ఉంటుంది. ముందు వరుస అలాగే మధ్య వరుసలో కూర్చునే ప్రయాణికులకు విశాలమైన లెగ్‌‌రూమ్ ఉంటుంది. డాట్సన్ గో ప్లస్ ఎమ్‌పివిలో కూడా హ్యాచ్‌బ్యాక్ వెర్షన్ మాదిరిగానే సెంటర్ కన్సోల్ ఉండదు. గేర్ బాక్సును డ్యాష్‌బోర్డుకే జతచేయబడి ఉండటం వలన ముందు వరుసలో మంచి స్పేస్ లభిస్తుంది.

డాట్సన్ ఉత్పత్తి వ్యయాన్ని తగ్గించుకునేందుకు గాను గో హ్యాచ్‌బ్యాక్ కారును పెద్దగా మార్పు చేయకుండా, వెనుక వైపు మాత్రమే కాస్తంత పొడవును పెంచి ఈ ఎమ్‌పివి రూపొందించింది. అందుకే వెనుక డోరు కూడా చిన్నదిగా అనిపిస్తుంది. ఇంత పెద్ద ఎమ్‌పివికి అంత చిన్న డోర్ ఉండటం కొంచెం ఇబ్బందిగానే అనిపిస్తుంది.

డాట్సన్ గో ప్లస్ ఎమ్‌పివి వెనుక రెండు వరుసలలోని సీట్లను పూర్తిగా ముందుకు మడచి, లగేజ్ రూమ్‌ను పెంచుకోవచ్చు. మూడవ వరుసలోని సీట్లు పొట్టిగా ఉండే వారికి లేదా చిన్న పిల్లకు మాత్రమే సరిపోయేలా ఉంటాయి. పొడవుగా ఉన్నవారు లేదా కొంచెం లావుగా ఉన్న వారు ఇందులో సౌకర్యంగా కూర్చోలేకపోవచ్చు.

డాట్సన్ గో హ్యాచ్‌బ్యాక్ మాదిరిగానే డాట్సన్ గో ప్లస్ ఎమ్‌పివి కూడా 'మొబైల్ డాకింగ్ స్టేషన్'తో లభ్యం కానుంది. దీని సాయంతో మీ స్మార్ట్‌ఫోన్‌ను ఇన్ఫోటైన్‌మెంట్ ఎక్విప్‌మెంట్‌గా మార్చేసుకోవచ్చు.