రష్యా మార్కెట్ కోసం డాట్సన్ సెడాన్; పేరు 'ఆన్-డు'

వందేళ్లకు పైగా చరిత్ర కలిగిన డాట్సన్ బ్రాండ్ రష్యా మార్కెట్లోకి ప్రవేశించడం ఇదే మొట్టమొదటి సారి. డాట్సన్ ఆన్-డు సెడాన్ ద్వారా రష్యన్ కస్టమర్లకు చేరువ కానున్న డాట్సన్ బ్రాండ్, అక్కడి మార్కెట్లో ఇప్పటికే పాతుకుపోయిన నిస్సాన్, ఇన్ఫినిటి బ్రాండ్ల సరసన చేరనుంది.

మోటారింగ్ చరిత్రలో అతి పురాతన పేర్లలో ఒకటైన డాట్సన్, జపాన్‌లో తమ తొలి కారు డ్యాట్ (DAT)ని విడుదల చేసి సరిగ్గా వందేళ్లు గడచిన తర్వాత ఈ బ్రాండ్ రష్యాలోకి ప్రవేశించింది.

డాట్సన్ మాతృ సంస్థ నిస్సాన్ మోటార్ కార్పోరేషన్ ఇప్పటికే రష్యా మార్కెట్లో, నిస్సాన్ మరియు ఇన్ఫినిటి బ్రాండ్లతో పలు సెగ్మెంట్లలో కార్లను విక్రయిస్తుండగా, డాట్సన్ బ్రాండ్ రాకతో ఎంట్రీ లెవల్ సెగ్మెంట్లోతో అన్ని వెహికల్ సెగ్మెంట్లను కవర్ చేసినట్లయింది.

ఈ సందర్భంగా నిస్సాన్ మోటార్ ప్రెసిడెంట్, సీఈఓ కార్లోస్ ఘోస్న్ మాట్లాడుతూ.. తమ కంపెనీకి రష్యా ప్రపంచంలో కెల్లా 5వ అతిపెద్ద మార్కెట్ అని, రానున్న మూడేళ్ల అమ్మకాలను మూడింతలు పెంచుకోవాలని, అలాగే మార్కెట్ వాటాను రెట్టింపు చేసుకోవాలనే లక్ష్యంతో ఉన్నామని అన్నారు.

డాట్సన్ ఆన్-డు నాలుగు డోర్లు, ఐదు సీట్లతో విశాలమైన క్యాబిన్ కలిగిన ఓ పర్‌ఫెక్ట్ ఫ్యామిలీ సెడాన్ అని కంపెనీ పేర్కొంది.

డాట్సన్ ఆన్-డు సెడాన్ 4333 మి.మీ. పొడవును, 1700 వెడల్పును మరియు 1500 మి.మీ. ఎత్తును కలిగి ఉంటుంది. దీని బూట్ స్పేస్ సామర్థ్యం 530 లీటర్లు.

డాట్సన్ ఆన్-డు సెడాన్ స్టయిలింగ్‌ను జపాన్‌లో కంపెనీ యొక్క గ్లోబల్ డిజైన్ సెంటర్‌లో పూర్తి చేశారు.

ఇకపోతే దీని డెవలప్‌మెంట్ అండ్ ఇంజనీరింగ్‌ను అవ్‌టోవాజ్ ఇంజనీర్లు మరియు నిస్సాన్ ఇంజనీర్ల బృందం కలిసి రష్యాలో అభివృద్ధి చేశారు.

డాట్సన్ ఆన్-డు సెడాన్‌లో 1.6 లీటర్ పెట్రోల్ ఇంజన్‌ను ఉపయోగించారు. ఈ ఇంజన్ గరిష్టంగా 87 హెచ్‌పిల శక్తిని ఉత్పత్తి చేస్తుంది.

డాట్సన్ ఆన్-డు సెడాన్‌ను 4,00,000 రౌబ్లెస్ (రష్యన్ కరెన్సీ) కన్నా తక్కువకే అందించాలని కంపెనీ యోచిస్తోంది.

డాట్సన్ ఆన్-డు సెడాన్‌ను రష్యాలోని టోగ్లియట్టిలో ఉన్న అవ్‌టోవాజ్ ప్లాంట్‌లో తయారు చేయనున్నారు.