ఫెరారీ తన ఎక్స్‌క్లూజివిటీని కోల్పోనుందా?

ఫెరారీ అంటేనే అరుదైన బ్రాండ్. రోడ్డుపై అత్యంత అరుదుగా మనకు ఈ కార్లు కనిపిస్తుంటాయి. అదే దాని ఎక్స్‌క్లూజివిటీ. ఎవరికంటే వారికి ఫెరారీ కార్లను కొనుగోలు చేయటం సాధ్యం కాదు. ఒకవేళ ఎవరైనా ఫెరారీ కారును కొనుగోలు చేయాలని నిర్ణయించుకున్నా, తక్షణమే అది వారికి సొంతం కాదు. ఇందుకోసం వారు నెలలు కొన్నిసార్లయితే సంవత్సరాల తరబడి వేచి ఉండాల్సి ఉంటుంది.

ఫెరారీ కార్లను పరిమిత సంఖ్యలో ఉత్పత్తి చేస్తారు. కొన్ని రకాల మోడళ్లనయితే, పరిమిత యూనిట్లలో మాత్రమే తయారు చేస్తారు. అలాంటి వాటిని ఎంత ముందుగా వచ్చి బుక్ చేసుకుంటే అంత ముందుగా లభిస్తుంది. ఫెరారీ కార్లకు డిమాండ్ ఎక్కువగా ఉన్నప్పటికీ, కంపెనీ పరిమిత సంఖ్యలోనే వాటిని ఉత్పత్తి చేస్తుంటుంది. దీని వలన ఎక్కువ కాలం వేచి ఉండలేని కొందరు పటిష్ట కస్టమర్లు మనసు చంపుకొని వేరే బ్రాండ్ల వైపు మొగ్గు చూపుతుంటారు. కానీ నిజమైన ఫెరారీ అభిమానులు మాత్రం తమ వంతు కోసం ఎదురుచూస్తుంటారు.

ప్రస్తుత మార్కెట్ డిమాండ్‌కు అనుగుణంగా మరిన్ని ఎక్కువ యూనిట్ల ఫెరారీ కార్లను ఉత్పత్తి చేస్తామని, కానీ తమ బ్రాండ్స్ ఐకానిక్ స్టేటస్ విషయంలో మాత్రం ఎక్కడా రాజీపడబోమని మార్చియోన్ స్పష్టం చేశారు. ఫెరారీ ప్రస్తుతం సంవత్సరానికి 7,000 కార్లను ఉత్పత్తి చేస్తోంది. భవిష్యత్తులో ఈ ఉత్పత్తి సామర్థ్యాన్ని 10,000 యూనిట్లకు పెంచాలని కంపెనీ యోచిస్తోంది. ఇదే గనుక జరిగితే ఫెరారీ కూడా ఇకపై ఆడి, పోర్షే వంటి బ్రాండ్ల మాదిరిగా సాధారణ లగ్జరీ బ్రాండ్ అయిపోయి, తన ఎక్స్‌క్లూజివిటీని కోల్పోగలదని విశ్లేషకులు భావిస్తున్నారు.