గూగుల్ డ్రైవర్‌లెస్ కారులో మ్యాన్యువల్ కంట్రోల్స్ తప్పనిసరి!

కాలిఫోర్నియాకు చెందిన టెక్నాలజీ దిగ్గజం శాంటా క్లారాతో కలిసి గూగుల్ ఈ సెల్ఫ్ డ్రైవింగ్ కార్ ప్రోటోటైప్‌ను డిజైన్ చేసింది. ఇది బగ్ (పేడ పురుగు) ఆకారంలో ఉంటుంది.

గూగుల్ తయారు చేసిన ఈ సెల్ఫ్ డ్రైవింగ్ కారులో స్టీరింగ్ వీల్, బ్రేక్స్, యాక్సిలరేటర్ ఉండవు. ఇవన్నీ కూడా కారులో ఉండే సాఫ్ట్‌వేర్, మెకానిక్స్ ద్వారా కంట్రోల్ చేయబడుతాయి. కానీ, ఈ విషయాన్ని కాలిఫోర్నియా మోటార్ వాహన అధికారులు అంగీకరించడం లేదు. ఇందులో తప్పనిసరిగా మ్యాన్యువల్ కంట్రోల్స్ ఉండి తీరాల్సిందేనని వారు కోరుతున్నారు.

కారు పైభాగంలో మరియు ముందు వెనుక భాగాల్లో సెన్సార్లు, హెచ్‌డి సరౌండ్ కెమెరాలను ఇందులో ఉపయోగించారు. వీటి సాయంతో పాటుగా మ్యాప్స్ సాయంతో కారు దానంతట అదే దిశానిర్దేశం చేసుకుంటుంది. అయితే, కొత్తగా డెవలప్ చేయబోయే కారును రెగ్యులర్ కారు మాదిరిగానే డ్రైవర్ జోక్యంతో మ్యాన్యువల్‌గా డ్రైవ్ చేసుకునే వెసలుబాటు ఉంటుంది.

గూగుల్ తయారు చేసిన ఈ అటానమస్ కారులో ఇద్దరికి మాత్రమే చోటు ఉంటుంది. ఇందులో కూర్చున్న వారు చేయాల్సిందల్లా రెండు సీట్లకు మధ్యలో ఉన్న స్టార్ట్/స్టాప్ బటన్‌ను ప్రెస్ చేయటమే.

గూగుల్ కారు ఇంటీరియర్స్‌ను చాలా సింపుల్‌గా ఉంచారు. ఇందులో ప్యాసింజర్ సీట్ల ముందు కొంత లగేజ్ ఉంచుకునేందుకు స్థలం ఉంటుంది.

కారు ఏ రూట్లో వెళ్తుందో తెలిపేందుకు ఓ పెద్ద స్క్రీన్ ఉంటుంది. ప్రారంభ దశ కావటంతో ఈ డ్రైవర్ రహిత కారును వేగాన్ని గంటకు గరిష్టం 25 మైళ్ల (40 కెఎమ్‌పిహెచ్)కు మాత్రమే పరిమితం చేశారు.

అయితే, గూగుల్ కో-ఫౌండర్ సెర్గీ బ్రిన్ తెలిపిన సమాచారం ప్రకారం, భవిష్యత్తులో ప్రొడక్షన్ మోడల్‌ను గరిష్టంగా గంటకు 100 మైళ్ల (160 కెఎమ్‌పిహెచ్) వేగంతో పరుగులు తీసేలా అభివృద్ధి చేయనున్నారు.

ప్రస్తుతం గూగుల్ డ్రైవర్‌లెస్ కారు టెస్టింగ్ దశలో ఉంది. ఈ మోడల్‌ను సాధారణ రోడ్లపై టెస్ట్ చేసేందుకు గూగుల్‌కు ఆమోదం కూడా లభించినప్పటికీ, తాజాగా వీటికి మ్యాన్యువల్ కంట్రోల్స్ ఉండాలనే మెలిక పెట్టడంతో ఈ కార్ల టెస్టింగ్ మరికొంత కాలం జాప్యమయ్యే ఆస్కారం ఉంది.

గూగుల్ త్వరలోనే ఇలాంటి 100 ప్రోటోటైప్ కార్లను తయారు చేయనుంది. టెస్టింగ్ దశ విజయవంతంగా పూర్తయ్యి, అన్ని సెక్యూరిటీ సమస్యలు పరిష్కరించబడినట్లయితే, మరో రెండేళ్లలోనే ఇవి మనకు అందుబాటులోకి వస్తాయి.

వీడియో

గూగుల్ సెల్ఫ్ డ్రైవింగ్ కార్ ప్రోటోటైప్ డెమోను మీరు కూడా ఈ వీడియోలో చూడండి.